გომბორის უღელტეხილზე გაერთიანებული ოპოზიციის კოლონას საპატრულო პოლიციამ გზა გადაუკეტა. სამარტალდამცავების განცხადებით, გომბორის უღელტეხილზე გადაადგილების საშუალება დღეს მხოლოდ სამთავრობო მანქანებს ეძლევათ.

„არ მოძრაობს არავინ, ცოტა ხანი შეფერხებაა. არავინ არ გადაადგილდება. არ მიდის არცერთი მანქანა,“ - ამბობს საპატრულო პოლიციის თანამშრომელი.

გზებზე დაწესებულ შეზღუდვას ოპოზიციის ლიდერების პროტესტი მოჰყვა:

„ხელოვნურად შეგვიქმნეს დაბრკოლება, რომ გომბორის გზით არ გვატარებენ. ახლა ჩვენ მაინც ჩავალთ თელავში, მოვასწრებთ ჩასვლას, გურჯაანის გზით ჩავალთ, მაინც შევუშლით ხელს და მაინც გამოვხატავთ ჩვენს პროტესტს,“ - აღნიშნა კირკიტაძემ.

ავტომობილების კოლონა თელავისკენ მაინც დაიძრა, თუმცა არა გომბორის უღელტეხილით, არამედ გურჯაანის გავლით.