როდის გახდება ცნობილი ინაუგურაციის ხარჯები - პრეზიდენტის საინაუგურაციო კომისიის ხელმძღვანელის კომენტარი

პოლიტიკა - 17:04, 14 Dec, 2018

836

საქართველოს არჩეული პრეზიდენტის ინაუგურაციის ხარჯები ღონისძიების გამართვის შემდეგ გახდება ცნობილი.

მთავრობის ადმინისტრაციის უფროსის და პრეზიდენტის საინაუგურაციო კომისიის ხელმძღვანელის კახა კახიშვილმის ინფორმაციით, ერეკლე მეორის სახლ-მუზეუმში ინაუგურაციის ღონისძიების გამართვის შემდეგ, საზეიმო მიღება თელავში, თეატრის შენობაში გაიმართება.

მისი თქმით, ადგილზე სალომე ზურაბიშვილი უკვე იმყოფებოდა და ჩატარდა წინასაინაუგურაციო რეპეტიციაც.

„ ტრიბუნები აწყობილია, ყველაფერს ვასწრებთ და ინაუგურაცია ჩაივლის ლამაზად და მშვიდად. ვერაფერს მოგახსენებთ თბილისთან დაკავშირებით, მე პასუხისმგებელი ვარ თელავში ინაუგურაციის ჩატარებაზე. თბილისის ლოკაციის ღონისძიებაში ჩვენ არ ვიყავით ჩართული. სალომე ზურაბიშვილის შტაბი იყო ამის ორგანიზებაში ჩართული. რაც შეეხება ბიუჯეტს, ჯერ დაზუსტებული არ არის. თქვენთან მოსვლამდე ვესაუბრე კონტრაქტორ ფირმას და ბიუჯეტთან დაკავშირებით კითხვებზე ინაუგურაციის შემდეგ გიპასუხებთ“, - განაცხადა კახიშვილმა.

რაც შეეხება ინაუგურაციაზე სტუმრებს, როგორც კახიშვილმა აღნიშნა, სიები კიდევ დგინდება.

„ შემიძლია გითხრათ, რომ იქნება სომხეთის პრეზიდენტი, ასევე რამდენიმე ქვეყნის პარლამენტის თავმჯდომარე, ვიცე-პრემიერები და სხვა სტუმრები. იმ ადამიანებს, რომლებსაც ექნებათ მოსაწვევები, ღონისძიებას დაესწრებიან თელავის თეატრში. სიები მოგვაწოდა სალომე ზურაბიშვილის შტაბმა, ასევე ვთხოვეთ არასამთავრობო ორგანიზაციებს, კახეთის გუბერნატორს და თელავის მერს, რომ მოგვაწოდონ ეს სიები. მაგრამ ისიც გასაგებია, რომ ამ ტერიტორიაზე შესაძლოა ბევრი ადამიანი არ დაეტიოს. მცდელობა იყო, რომ ადამიანების მაქსიმალური ჩართულობა ყოფილიყო. მეორე ლოკაცია იქნება საზეიმო მიღება თელავის თეატრში, ასევე ვიხილავდით წინანდალს, თუმცა წინანდალში მიღება არ იქნება. საინაუგურაციო კომისიაში წინანდლის საკითხი არ იხილება“, - განაცხადა კახიშვილმა.