მმართველი გუნდი ინაუგურაციის დღეს ოპოზიციის მხრიდან პროვოკაციების მოწყობას ელოდება

პოლიტიკა - 15:05, 14 Dec, 2018

721

"ქართული ოცნება" ინაუგურაციის დღეს ოპოზიციის მხრიდან პროვოკაციების მოწყობას ელოდება. პარლამენტის თავმჯდომარის, ირაკლი კობახიძის შეფასებით, „ნაციონალურ მოძრაობას“ პროვოკაციების მოწყობა ახასიათებს.

„რაც შეეხება თელავში დაგეგმილ აქციას, ზოგადად, პროვოკაციების მოწყობა ეს არის "ნაცმოძრაობის" ხელწერა, თუმცა, ჩვენ ვართ აქ იმისთვის, რომ აღვკვეთოთ ასეთი პროვოკაციები და დამერწმუნეთ, რომ ინაუგურაცია ჩაივლის დაბრკოლებების გარეშე. შეიძლება იყოს გარკვეული პროვოკაციები, თუმცა, ამას შევხვდებით სათანადოდ, ისე, როგორც არის საჭირო და ისეთი სტილით, რომელიც ჩვენ დავნერგეთ 2012 წლის შემდეგ. აქედან გამომდინარე, მე რაიმე პრობლემას არ ველოდები თელავში... შეიძლება იყოს გარკვეული პროვოკაციები, თუმცა, ამას შევხვდებით სათანადოდ,“ - განაცხადა ირაკლი კობახიძემ.

საკითხზე კომენტარი გააკეთა მამუკა მდინარაძემაც. მისი თქმით, ინაუგურაციის დროს პროვოკაციების თავიდან არიდების მიზნით ყველა უწყება იქნება ჩართული.

„სახელმწიფომ ყველაფერი უნდა გააკეთოს იმისთვის, რომ გამორიცხული იყოს ნებისმიერი სახის პროვოკაცია. სახელმწიფოს ნებისმიერი მოქმედება და ამ შემთხვევაში შესაბამისი უწყების ეს მოქმედებაც, რომ კონკრეტულ ადგილზე ეუბნება უარს, აქედან გამომდინარეობს, ამაში შემდეგ ერთვებიან სამართალდამცავი ორგანოები, რომ ისინიც გამორიცხავენ პროვოკაციას, თავიანთი მიმართულებით, მობილიზებული იქნება, ბუნებრივია, სამართალდამცავი შესაბამისი სტრუქტურები და შეეცდებიან მაქსიმალურად, რომ გამორიცხონ ნებისმიერი პროვოკაცია. მე არ მგონია, რომ იქ შეკრებილი ადამიანები იმისთვის მიდიოდნენ, რომ პროვოკაცია მოაწყონ, ეს შეიძლება მათი ლიდერების სურვილი უფროა, მაგრამ ამაზე საზოგადოების ის ნაწილი, რომელიც ჩვენგან განსხვავებულ აზრს აფიქსირებს, არ წავა, მე ვფიქრობ, და ეს მოლოდინი მაინცდამაინც არ მაქვს,“ - განაცხადა მდინარაძემ.

გაერთიანებული ოპოზიცია გეგმავს, რომ 16 დეკემბერს თელავის ცენტრში მშვიდობიანი აქცია გამართოს. თუმცა, თელავის მერიამ მათ მოთხოვნას უარით უპასუხა.