სტრასბურგის სასამართლომ 2008 წლის ომის შესახებ წარდგენილი საჩივრები საქართველოს წინააღმდეგ დაუშვებლად სცნო. აღნიშნულის შესახებ განცხადება გაერთიანებულ ოპოზიციაში გაკეთდა.

პაატა დავითაიას განცხადებით, სტრასბურგის სასამართლომ ამ გადაწყვეტილებით დაადასტურა, რომ 2008 წლის რუსეთ-საქართველოს საბრძოლო მოქმედებებისას საქართველოს ადამიანის უფლებების წინააღმდეგ დანაშაული არ ჩაუდენია:

„ძალიან მნიშვნელოვანი გადაწყვეტილება მიიღო სტრასბურგის სასამართლომ, რომლითაც დასტურდება, რომ 2008 წელს, საბრძოლო მოქმედებების დროს, ქართულ მხარეს არ დაურღვევია ადამიანის უფლებები და თავისუფლებები. რეალურად ჩვენ ვნახეთ, რომ ის ქმედებები, რა ქმედებებითაც რუსულმა მხარემ, ოსურ მხარესთან ერთად დაიწყო მოქმედება და სარჩელების შეტანა საქართველოს წინააღმდეგ, ეს მათ ჩაუვარდათ და რეალურად, ჩვენ ვხედავთ, როდესაც ქალბატონი სალომე ზურაბიშვილი აბრალებდა ქართულ მხარეს ცხინვალის დაბომბვას, ამ ფონზე სტრასბურგის სასამართლომ გამოაცხადა, რომ საბრძოლო მოქმედებებში ქართულ მხარეს ადამიანის უფლებები არ დაურღვევია. ძალიან მნიშვნელოვან მტკიცებულებად იქნება ეს გამოყენებული იგივე ჰააგის სისხლის სამართლის საერთაშორისო სასამართლოშიც, იმიტომ, რომ ერთ-ერთი მოქმედებები, რის დაბრალებასაც რუსული მხარე ქართული მხარისთვის ცდილობს, მდგომარეობს იმაში, რომ ქართულმა მხარემ ჩაიდინა კაცობრიობის წინააღმდეგ დანაშაული, რაც სტრასბურგის გადაწყვეტილებით გაბათილდება, სამწუხაროა, რომ ამ ნარატივშ, რაზეც აპელირებდა რუსული მხარე, ჯდებოდა სალომე ზურაბიშვილის განცხადებებიც, მაგრამს აბედნიეროა ის, რომ სტრასბურგის ადამიანის უფლებათა სასამართლომ ეს ყველაფერი გააქარწყლა, ეს კიდევ აჩვენებს იმას, რომ ქართულმა მხარემ დაუშვა ძალიან დიდი შეცდომა, როდესაც შეაჩერა გამოძიება ამ ფაქტთან დაკავშირებით და ქვემდებარე გახადა ეს საკითხი. გამოძიების პროცესში მტკიცდებოდა ის, რომ ქართულ მხარეს არ ჰქონდა ეს დანაშაული ჩადენილი, ხოლო რუსი სეპარატისტების მხრიდან ცალსახად იკვეთებოდა დანაშაული ადამიანის უფლებებისა და კაცობრიობის წინააღმდეგ და ეს საქმეები ჩვენ უნდა გამოგვეძიებია“, - განაცხადა პაატა დავითაიამ.