პარლამენტის ახალი რეგლამენტის ამოქმედებას, რომლის თანახმადაც, დეპუტატების მისამართით ხისტი სანქციები ამოქმედდება, კრიტიკულად აფასებენ ოპოზიციის წარმომადგენლები. მათი თქმით, თავად „ქართული ოცნების“ წევრები არ დადიან პარლამენტში, რის გამოც, მაგალითად, გუშინ 2019 წლის ბიუჯეტის პროექტის კენჭისყრა კვორუმის არარსებობის გამო ჩაიშალა.

ფრაქცია „ნაციონალური მოძრაობის“ თავმჯდომარე, დეპუტატი რომან გოცირიძე ამბობს, რომ კვორუმი ხშირად სწორედ საპარლამენტო უმრავლესობის არმისვლით ვარდება.

„დაიწყება თუ არა დროზე და გამოცხადდებიან თუ არა უმრავლესობის დეპუტატები, არავინ იცის და სწორედ ამ მიზეზით ჩავარდა გუშინ კენჭისყრა და კიდევ 2 საათიანი მოცდენა დაემატება ამ უსაქმურობას და გამოდის, რომ ამ ორ წელიწადში ჩემი ცხოვრების 8 დღე ვიჯექი მათ მოლოდინში,“ - განაცხადა რომან გოცირიძემ.

პარლამენტის ფრაქცია „ევროპული საქართველოს“ თავმჯდომარე, ოთარ კახიძე მმართველი გუნდის განცხადებებს სამარცხვინოს უწოდებს, როდესაც ისინი ოპოზიციის წარმომადგენლების პარლამენტში სიარულზე ამახვილებენ ყურადღებას.

„ძალიან უხერხულია იმიტომ, რომ ამდენი დეპუტატი როცა ჰყავთ და პასუხისმგებლობა მათზეა, არ ცხადდებიან და აქეთ იშვერენ ხელს, ჩვენ გვინდა გამოვცხადდებით პარლამენტში და გვინდა ბრიფინგების მეშვეობით დავუწყებთ ოპონირებას, გვინდა Facebook live-ებით ვესაუბრებით , ეს არის ჩვენი გადასაწყვეტი, მაგრამ პასუხისმგებლობა პარლამენტის მართვასა და კანონშემოქმედებით საქმიანობაზე აქვთ მათ,“ - განაცხადა ოთარ კახიძემ.

ახალი კონსტიტუციის ძალაში შესვლის პარალელურად რამდენიმე დღეში ამოქმედდება ახალი რეგლამენტი, რომელიც დეპუტატების მისამართით ხისტი სანქციების შემოღებას გულისხმობს.

იმ შემთხვევაში თუ კანონმდებელს სხდომების ნახევარზე მეტი ექნება გაცდენილი, მას სადეპუტატო უფლებამოსილება შეუწყდება. ასევე დასჯადი ხდება დეპუტატების მხრიდან ერთმანეთის მიმართ გამოთქმული არაეთიკური და შეურაცხმყოფელი რეპლიკები.