დედაქალაქის 2019 წლის ბიუჯეტი - საკრებულოში შესწორებული პროექტი უკვე შევიდა. თბილისის საკრებულოს უმრავლესობის განცხადებით, ბიუჯეტის ახალ ვარიანტში მათი რეკომენდაციები სრულად არის გათვალისწინებული. ირაკლი ზარქუას თქმით, პროექტის შესწორებული ვარიანტით ბიუჯეტი მთლიანობაში 56 მილიონი ლარით იზრდება.

„გადამუშავებული ვარიანტი პირველ ვარიანტთან შედარებით გაზრდილია 56 მილიონი ლარით და შეადგინა 927 631 500 ლარი. ეს უბრალოდ მინდა იმ ოპოზიციის გასაგონად ვთქვა, რომელიც გაჰკიოდა სულ რამდენიმე კვირის წინ, რომ თურმე ბიუჯეტი შემოტანილი გაცილებით ნაკლებია, თურმე არ ასახავს ის დედაქალაქის მოსახლეობის განწყობას, იმ გამოწვევებს, არა და ჩვენ საპირისპიროს ვუმტკიცებდით. ის რეკომენდაციები, რაც ჩვენ გვქონდა პირველ პროექტთან მიმართებაში დედაქალაქის უმრავლესობა საკრებულოდან , ფაქტიურად ყველა ის შენიშვნა, რეკომენდაცია მაქსიმალურად არის გათვალისწინებული შესაძლებლობების ფარგლებში,“ - განაცხადა ირაკლი ზარქუამ.

2019 წლის თბილისის ბიუჯეტს მხარს არ უჭერს ოპოზიცია:

„მაშინ, როდესაც ამ ქვეყანაში კატასტროფულად არის გაძვირებული ყველაფერი და გუშინ ჩვენს გაჭირვებულ მოსახლეობას კიდევ პური გაუძვირეს, იმის ნაცვლად, რომ მერიას ქამრები შემოიჭირა და შეემცირებინა ბიუროკრატია, ამ ყველაფრის ნაცვლად კიდევ 7 მილიონი ლარით გაზარდეს სახელფასო ფონდი ფულადი ჯილდოებისთვის და ასევე თავიანთი მივლინებების, რესტორნების, მანქანების მომსახურების ხარჯები. ეს ბიუჯეტი ისევ და ისევ მორგებულია მაღალჩინოსნების ფუფუნებაზე, მათ კარგად ყოფნაზე, კეთილდღეობაზე და არაფერი საერთო არა აქვს ამას თბილისელების კეთილდღეობასთან და თბილისელების პრობლემების მოგვარებაში,“ - განაცხადა ირაკლი ნადირაძემ.

ოპოზიციის ბრალდებებს დედაქალაქის მერი კახა კალაძეც პასუხობს:

„ჩვენ უფასო სასადილოებზე დაფინანსება გავზარდეთ, არ ვიცი გაქვთ თუ არა ინფორმაცია. ემთხვეოდა არა, ეს ჩვენ გამოვაცხადეთ და ამის შემდეგ დაიწყეს მათ საუბარი. უნდოდათ, რომ ქულები ჩაეწერათ, თუმცა ამას არანაირი მნიშვნელობა არ აქვს. დედაქალაქს ჰყავს პასუხისმგებლიანი მთავრობა და საკრებულო, რომელიც სწორად გეგმავს ბიუჯეტს და აცნობიერებს იმ ვალდებულებებს და საჭიროებებს, რომელიც სჭირდება დედაქალაქს და დედაქალაქის მოსახლეობას. თუ აქვთ რაიმე შენიშვნები, რომელიც აზრს მოკლებული არ არის, ჩენ მზად ვართ გავითვალისწინოთ ყველა შენიშვნა,“ - განაცხადა კახა კალაძემ.