ენმ საკრებულოს წინა მოწვევის დეპუტატებს ბიუჯეტის გაფლანგვაში ადანაშაულებს და მათი პასუხისმგებლობის დაყენებას ითხოვს

პოლიტიკა - 10:06, 10 Dec, 2018

796

„ნაციონალური მოძრაობის" წევრი ლევან ხაბეიშვილი საკრებულოს წინა მოწვევის დეპუტატებს საბიუჯეტო თანხის გაფლანგვაში ადანაშაულებს და მათი პასუხიმგებლობის საკითხის დაყენებას ითხოვს.

მისი თქმით, ბიუჯეტის გაფლანგვაზე პასუხისმგებელი პირების სხვა დეპუტატებთან ერთად საკრებულოს თავმჯდომარე გიორგი ტყემალაძე და რიმა ბერაძე არიან.

საქმე ეხება სამი წლის წინ „თბილისის მეწარმეობის ხელშეწყობის ცენტრის"" შექმნას, რომელიც წელიწად-ნახევარში გაუქმდა. ამ პერიოდში ბიუჯეტიდან ცენტრისთვის მილიონ ნახევარზე მეტი გამოიყო - საიდანაც თითქმის მილიონ 200 ათასი ადმინისტრაციული ხარჯი იყო.

დეპუტატის თქმით, არსებობს აუდიტის დასკვნაც, სადაც აღნიშნულია, რომ ცენტრის სამოქმედო გეგმა არ იყო შედეგზე ორიენტირებული, რაც მისი გაუქმების მიზეზიც გახდა;

„სანამ კონკრეტული ადამიანები, როგორიც არის რიმა ბერაძე, როგორიც არის გიორგი ტყემალაძე, როგორიც არიან ის დეპუტატები, რომლებიც ხელს უწევენ მილიონობით ლარის გაფლანგვას ბიუჯეტიდან არ დაისჯებიან, მანამდე ეს ადამიანები კანონის სახელით გააგრძელებენ ბიუჯეტის ძარცვას. ამისთვის მნიშვნელოვანია ეს საკითხი გადავიდეს სამართლებრივ სივრცეში და კონკრეტული ადამიანების სისხლის სამართლებრივი პასუხისმგებლობის საკითხი დადგეს,“-ამბობს ლევან ხაბეიშვილი.