შაბათს, 8 დეკემბერს, ქუთაისში, სასტუმროში King David საქართველოს ადვოკატთა ასოციაციის საგანგებო ბრიფინგი გაიმართა.

ბრიფინგზე ადვოკატთა ასოციაციის თავმჯდომარემ დავით ასათიანმა ისაუბრა ადვოკატთა საქმიანობაში ჩარევისა და პროფესიული საქმიანობის განხორციელებაში ხელის შეშლის ფაქტების შესახებ. კერძოდ კი, სოციალურ ქსელ „ფეისბუკში“ გამოჩენილი გვერდის თაობაზე, რომელიც სხვადასხვა ადვოკატის, განსაკუთრებით კი ქუთაისში მომუშავე ადვოკატებისა და მთლიანად ადვოკატთა ასოციაციის დისკრედიტაციას ეწევა.

აღნიშნული გვერდი 6 დეკემბერს „ფეისბუკის“ ადმინისტრაციამ წაშალა, თუმცა მისი შემქმნელები, მანამდე იმუქრებოდნენ, რომ მსგავსი ტიპის მადისკრედიტირებელი გვერდები მომავალშიც შეიქმნებოდა.

დავით ასათიანმა საქართველოს შინაგან საქმეთა სამინისტროსა და საქართველოს მთავარ პროკურატურას მოუწოდა აღნიშნული საკითხით დაინტერესებისა და ყველა იმ პირის გამოვლენისკენ, ვინც ჩართულია აღნიშნულ ქმედებებში. ასოციაციის თავმჯდომარის თქმით, მსგავსი ფაქტების რეაგირების გარეშე დატოვება შექმნის საშიშ პრეცენდენტს და შეუქმნის საფრთხეს ადვოკატთა დამოუკიდებლობის ხარისხს.

ღონისძიებას დაესწრნენ ადვოკატები საქართველოს სხვადასხვა რეგიონიდან.