„ქრისტიან-დემოკრატიული მოძრაობა" სალომე ზურაბიშვილის ინაუგურაციასთან დაკავშირებით, განცხადებას ავრცელებს.

"მოგეხსენებათ, 2018 წლის 16 დეკემბერს სალომე ზურაბიშვილის ინაუგურაცია გაიმართება თელავში, ერეკლე მეორის სასახლეში. ამ ფაქტმა საკმაოდ დიდი აჟიოტაჟი გამოიწვია.

ძირითადი მიზეზი, რის საფუძველზეც აკრიტიკებენ ამ გადაწყვეტილებას არის კანონთან შეუსაბამობა, რომლის მიხედვითაც, პრეზიდენტის ინაუგურაციის ადგილად პარლამენტის შენობის ეზოა მითითებული, თუმცა მთავრობის ადმინისტრაციის განცხადებით „2001 წლის პრეზიდენტის ბრძანებულება დღეს უკვე აღარ არის ჰარმონიაში მოქმედ კანონმდებლობასთან. შესაბამისად, საქართველოს პრემიერის ადმინისტრაციაში მუშავდება ინაუგურაციის ჩატარების ახალი წესი."

მსგავსი ქმედება საკმაოდ ადეკვატური და ოპტიმალური გზაა მოსალოდნელი კონფლიქტის თავიდან არიდებისა.

მსგავსი მიდგომის გამოყენებით თავის დროზე შესაძლებელი იყო 26 მაისის მოვლენების თავიდან არიდება, აღლუმის ჩასატარებლად სხვა ლოკაციის არჩევით. საკვირველიც სწორედ ისაა, რომ „ნაც. მოძრაობის" წევრები სალომე ზურაბიშვილის ამ არჩევანს არამხოლოდ კანონდარღვევად, არამედ სუსტ ნაბიჯადაც მიიჩნევენ.

ძალიან მარტივად შეიძლებოდა ამ ნაბიჯის სწორი არგუმენტირება, რაც ვერ მოახერხეს სალომე ზურაბიშვილმა და მისმა გუნდმა, მშრალი და არაარგუმენტირებული პასუხებით, ეს კი მის სუსტ პიარზე მიუთითებს.

აღსანიშნია ის ფაქტიც, რომ ინაუგურაციის ჩატარებას თავდაპირველად გეგმავდნენ ფოთში, შემდგომ კი უპირატესობა მიანიჭეს თელავს, რასაც გარკვეულწილად სიმბოლური დატვირთვა აქვს" - აღნიშნულია პარტიის განცხადებაში.