ივანიშვილი ისევ გაუჩინარდა - ექსპრემიერი თანაგუნდელებს ამ დრომდე არ უნახავთ

პოლიტიკა - 18:10, 07 Dec, 2018

3342

საპრეზიდენტო არჩევნების შემდეგ "ქართული ოცნების" თავმჯდომარე მმართველი გუნდის წევრებს აღარ უნახავთ. ამ დრომდე არც უმრავლესობის სხდომა ჩატარებულა.

უმრავლესობის წევრები იმედოვნებენ, რომ პარტიის ლიდერს მაშინ შეხვდებიან, როცა საპარლამენტო უმრავლესობის წევრების შეკრება ჩაინიშნება.

"არჩევნების შემდეგ უმრავლესობის შეკრება არ ჩატარებულა. როდესაც იქნება უმრავლესობის შეკრება, რომელსაც, როგორც წესი ესწრება პარტიის თავმჯდომარე. იქ თუ გვექნება ამაზე მსჯელობა და შევთანხმდებით მერე შეიძლება გითხრათ. ვიღაცას შეიძლება სურვილი აქვს გაქრეს ეს ადამიანი პოლიტიკური ველიდან მაგრამ, ის უფრო და უფრო აქტიურია,“- განაცხადა ლევან კობერიძე.

აკაკი ზოიძის თქმით, კი "სადაც იყო იქ დარჩა ბატონი ბიძინა". მისი თქმით, ივანიშვილის პარტიის ლიდერია და ის ცალკე მდგომი პოლიტიკური ფიგურა არ არის.

„არ არსებობს ცალკე მდგომი ბიძინა ივანიშვილი, არსებობს "ქართული ოცნება" პარტია, არსებობს პარტიის თავმჯდომარე ბიძინა ივანიშვილი და ასევე არსებობს "ქართული ოცნების" ხელისუფლება,“-ამბობს აკაკი ზოიძე.

გია ვოლსკის განცხადებით, ბიძინა ივანიშვილი ქვეყნის პოლიტიკურ ცხოვრებაში საკმაოდ აქტიურად იყო ჩართული წინასაარჩევნო პერიოდში.

„გამოჩენა არ გამოჩენასთან დაკავშირებით მე ვიტყოდი, რომ ხშირად ჩანს მიხეილ სააკაშვილი ტელევიზიით, მაგრამ აქამდე არც ჭკვიანური უთქვამს რამე და არც საქართველოსთვის სასარგებლო,“-ამბობს ვოლსკი.