ადვოკატი, ოთარ კახიძე ევროპის საბჭოს კომიტეტის მიერ მერაბიშვილის განაჩენების ეჭვქვეშ დაყენებაზე კიდევ ერთ განმარტებას აკეთებს.

კახიძის განცხადებით, პრაქტიკულად, მინისტრთა კომიტეტმა მთავრობას მოუწოდა, რომ ვანო მერაბიშვილზე განხორციელებულ შესაძლო ზეწოლასთან დაკავშირებით გამოძიება ჩაატაროს.

„პირველად დადგა ეჭვქვეშ ვანო მერაბიშვილის წინააღმდეგ გამოტანილი განაჩენების კანონიერება, ვინაიდან მინისტრთა კომიტეტმა მოუწოდა და დაავალა პირდაპირ, მთავრობას, რომ ჩაატაროს გამოძიება მასზე განხორცილებული ზეწოლის, იმ კუთხით, რომ დადგინდეს აღნიშნული ზეწოლის კავშირი მის წინააღმდეგ წარმოებულ სხვადასხვა სისხლის სამართლის საქმეებთან. ეს ძალიან მნიშვნელოვანი ასპექტია, ვინაიდან, პრაქტიკულად, ეს არის ვანო მერაბიშვილის სამომავლო მარეაბილიტირებელი საფუძველი, ერთი საქმით, რომელიც ეხებოდა მის წინასწარ პატიმრობას, ეჭვქვეშ დადგა ყველა განაჩენი, რომლის გადასინჯვასაც, რა თქმა უნდა, მისი დაცვის მხარე აუცილებლად მოითხოვს,“ - განაცხადა ოთარ კახიძემ.

ევროსაბჭოს მინისტრთა კომიტეტი მერაბიშვილის საქმეზე სკანდალურ განცხადებას ავრცელებს. კომიტეტში არ გამორიცხავენ, რომ არსებობდეს კავშირი ამ განაჩენებსა და იმ ზეწოლას შორის, რომელსაც ადგილი ჰქონდა მერაბიშვილის საკნიდან გაყვანის დროს. ევროსაბჭოს კომიტეტი საქართველოს ხელისუფლებას ფაქტის დროული გამოძიებისკენ მოუწოდებს.

მათი რეკომენდაციაა გამოავლინილ იქნენ პასუხისმგებელი პირები და დაიწყოს მათზე სისხლის სამართლებრივი დევნა.