ნინო ლომჯარიას თქმით, ვანო მერაბიშვილის საქმეზე ევროპის საბჭოს მინისტრთა კომიტეტის გადაწყვეტილება სახალხო დამცველის რეკომენდაციებს ემთხვევა.

მისი თქმით, ამ შემთხვევაში, მნიშვნელოვანია, ითქვას, რომ საკნიდან პატიმრის გაყვანის საქმეში შესაძლოა, ჩართული იყოს ყოფილი მთავარი პროკურორი.

ომბუდსმენის განცხადებით, მინისტრთა კომიტეტის დასკვნის საფუძველზე, ვანო მერაბიშვილის საკნიდან შესაძლო გაყვანის ეპიზოდი ინსტიტუციურად დამოუკიდებელმა ორგანომ უნდა გამოიძიოს.

„ამ შემთხვევაში, მნიშვნელოვანი იქნება, სახელმწიფომ აღნიშნულ გარემოებაზე დამოუკიდებელი გამოძიება აწარმოოს. არ ვიცი, რამდენად შეძლებს ეს გამოძიება აწარმოოს პროკურატურამ, რადგან სავარაუდოდ სწორედ ყოფილი მთავარი პროკურორი და პროკურორები იყვნენ ჩართული აღნიშნული საქმის თუნდაც წინა გამოძიებაში. ამიტომ ჩვენ ვაფრთხილებდით სახელმწიფოს, რომ ამ საკითხზე დამოუკიდებელი გამოძიების მოთხოვნის აუცილებლობა დადგებოდა დღის წესრიგში“,- განაცხადა ნინო ლომჯარიამ.

მისი თქმით, მინისტრთა კომიტეტი იმეორებს სახალხო დამცველის კიდევ ერთ რეკომენდაციას, რომელიც პენიტენციურ დაწესებულებაში ვიდეომასალის დაარქივების აუცილებლობას ეხება.