დარღვევებით ჩატარებული არჩევნები, თავდასხმები და ვადიანი ულტიმატუმი ხელისუფლებას - გაერთიანებული ოპოზიცია დიპლომატებს ხვდებიან

პოლიტიკა - 12:09, 07 Dec, 2018

888

გაერთიანებული ოპოზიციის ლიდერები საქართველოში აკრედიტებული დიპლომატიური კორპუსის წარმომადგენლებს ხვდებიან.

ოპოზიციის წარმომადგენლები დიპლომატებს საპრეზიდენტო არჩევნებისას დაფიქსირებულ დარღვევებს გააცნობენ.

შეხვედრის განმავლობაში ოპოზიციის წარმომადგენლებზე განხორციელებულ თავდასხმებზეც ისაუბრებენ. მათ შორის ქუთაისის აეროპორტში თაკო ჩარკვიანსა და მის მეუღლეზე მომხდარ თავდასხმაზეც.

საუბარი ასევე შეეხება სამომავლო გეგმებს, ხელისუფლებისთვის წაყენებულ ულტიმატუმს ვადამდელ საპარლამენტო არჩევნების ჩატარებასთან დაკავშირებით, რომელიც პროპორციული წესით უნდა გაიმართოს.

გიორგი ვაშაძემ შეხვედრის დაწყებამდე იმ სამ თემაზე ისაუბრა, რომელსაც შეხვედრის ფარგლებში განიხილავენ:

„სამი მნიშვნელოვანი საკითხი, რაზეც ვიმსჯელებთ, არის საარცევნო დარღვევები და შემდგომი სამართლებრივი პროცედურები, ჩვენ ვამზადებთ სარჩელს და ამაზე გვექნბეა დავა, მეორე, ეს არის პოსტსაარჩევნო აგრესიული რიტორიკა ხელისუფლებისა და მისი წარმომადგენლის მხრიდან. თავდასხმები ჩვენს ლიდერებსა თუ აქტივისტებზე და მესამე, ეს არის ის აბსოლუტურად დესტრუქციული პოზიცია, რომელიც დაიჭირა ქართულმა ოცნებამ ჩვენს მიერ შეთავაზებულ მოლაპარაკებებთან დაკავშირებით“, - განაცხადა გიორგი ვაშაძემ.

ნიკოლოზ ვაშაკიძის განცხადებით, გაერთიანებული ოპოზიცია დიპლომატიურ კორპუსთან სრული თანამშრომლობისთვის მზად არის:

„სახელმწიფო დეპარტამენტმა უკვე სამი განცხადება გააკეთა და ყოველი მომდევნო გაცილებით უფრო მძაფრია, ვიდრე წინა. რა თქმა უნდა აქედან გამომდინარე დიპლომატიურ კორპუსს ძალიან აინტერესებს ეს დეტალები, ბუნებრივია, ისინი აპირებენ გააგრძელონ კონსულტაციები ამ თემასთან დაკავშირებით გაერთიანებულ ოპოზიციასთან, რა თქმა უნდა მათ განაცხადეს იმის შესახებ, რომ ეს უმსგავსობა უნდა დამთავრდეს აღმოიფხვრას, ჩვენ სრული მზადყოფნა გვაქვს მათთან ვითანამშრომლოთ, მივაწოდოთ სრული ინფორმაცია“, - განაცხადა ნიკოლოზ ვაშაკიძემ.