საქართველოს არჩეული პრეზდენტის ინაუგურაცია - თელავში, ერეკლე მეფის სასახლის ეზოში მზადება დაიწყო. კახეთში უკვე ცავიდნენ საორგანიზაციო კომისიის წევრები და დაათვალიერეს ის ადგილები, სადაც ინაუგურაცია უნდა გაიმართოს. ღონისძიების ორგანიზატორი და რეჟისორი ბასა ფოცხიშვილი ინაუგურაციის ყველა დეტალზე ჯერ არ საუბრობს, მაგრამ აღნიშნავს, რომ სალომე ზურაბიშვილს გარკვეული მოთხოვნები გააჩნია:

„ინაუგურაცია თავისთავად მოიცავს ისეთ წესებს, რომლის დარღვევაც არ შეიძლება. ეს არის ის პროტოკოლური ნაწილი. ეს გარემო დეკორაციას არ საჭიროებს, მაგრამ აუცილებელია ვთქვათ ტრიბუნა სადაც განლაგდებიან მაყურებლები. ქალბატონი სალომეს გამოსასვლელი ადგილი. რაც შეეხება მუსიკალურ ნაწილს, ინაუგურაციაზე ყოველთვის სრულდება ჰიმნი. და აგრეთვე ძალიან მინდა, რომ შესრულდეს მრავალჟამიერი. როგორც ვიცი ეს ქალბატონი სალომეს სურვილიც არის. იმიტომ რომ მრავალჟამიერი საქართველოს შემადგენელი ნაწილი არის,“-განაცხადა ბასა ფოცხიშვილმა.

რაც შეეხება ინაუგურაციის სამხატვრო მხარეს, ღონისძიების რეჟისორები ამბობენ, რომ ინაუგურაცია უნდა იყოს სადა და ევროპულ სტილთან მორგებული.

„უნდა იყოს სადა, თავშეკავებული და სტილში უნდა იყოს გამართული, მორგებული აი ამ ფანტასტიურ გარემოსთან. თამართან პარალელი ვერანაირად ვერ იქნება. ერთადერთი არის ის, რომ ქალი პრეზიდენტი ჩვენთვის პირველია და შინაგანად რა თქმა უნდა რაღაცნაირად ეს შეიძლება მხატვარს ჰქონდეს იდეაში, რაღაც ამდაგვარი. მაგრამ სტილში ვერ იქნება. სად მონარქია და სად პრეზიდენტი,“-განაცხადა თამრიკო ფოცხიშვილმა.

საქართველოს არჩეული პრეზიდენტის ინაუგურაცია 16 დეკემბერს გაიმართება.