საქართველოს ოკუპირებული რეგიონები და რუსეთის მორიგი აგრესია უკრაინის მიმართ - ატლანტიკურ საბჭოში ახალი ეფექტური სანქციების აუცილებლობაზე იმსჯელეს

პოლიტიკა - 12:01, 06 Dec, 2018

747

აზოვის ზღვაში უკრაინის წინააღმდეგ რუსეთის მორიგი აგრესიის შემდეგ, დასავლეთმა რეაგირება ახალი ეფექტური სანქციებით, დარგობრივი შეზღუდვებით უნდა მოახდინოს, განსაკუთრებით რუსეთის ნავთობისა და გაზის მრეწველობისა და პუტინის მეგობრების წინააღმდეგ ინდივიდური შეზღუდვებით. ასეთ რეკომენდაციას ძლევენ აშშ-ის ხელისუფლებას ანალიტიკოსები, რომლებმაც ამ საკითხზე „ატლანტიკურ საბჭოში“ იმსჯელეს.

2008 წელს, რუსეთის საქართველოში შეჭრიდან მალევე, დასავლეთის ყურადღება მოდუნდა. მაგრამ რუსეთის თამაში ამით არ დასრულებულა. სამხრეთ ოსეთისა და აფხაზეთის დამოუკიდებლობის აღიარების შემდეგ, რუსმა სამხედროებმა დაიწყეს მავთულხლართების წინ წაწევა და ადგილზე ახალი რეალობის შექმნა. ამ ყოველდღიურმა, მცირე ქმედებებმა შესაძლოა მსოფლიოს ყურადღება არ მიიპყრო, მაგრამ ერთ თვეში მოვბრუნდებით და დავინახავთ, რომ სასაზღვრო ხაზი რამდენიმე კილომეტრით არის გადატანილი. ის, რომ საერთაშორისო თანამეგობრობა ამაზე ხმამაღლა არ საუბრობს, ასევე რეაქციის ნაკლებობა, ამ ფაქტებთან შეგუებას უტოლდება.“-განაცხადა ამერიკა-რუსეთის ფონდის დირექტორი სელესტე უოლანდერმა.

ანალიტიკოსები ურჩევენ ჩრდილოატლანტიკურ ალიანსს, კიდევ უფრო გააძლიეროს ყოფნა შავ ზღვაზე, მათ შორის სწავლებებით, რომლებშიც საქართველო და უკრაინა იქნებიან ჩართულები.

„ბოლო თვეების განმავლობაში რუსეთმა გაზარდა ზეწოლას უკრაინაზე, რაც 2008 წლის გაზაფხულსა და ზაფხულში საქართველოში მის მიერ განხორციელებულ ქმედებებს გვახსენებს. პუტინი ცდის დასავლეთს, იმ იმედით რომ ყოველ გადადგმული ნაბიჯზე, მას წინ მხოლოდ სიტყვიერი პროტესტები შეხვდება. ნატომ უნდა იპოვოს გზა, იმისთვის რომ კიდევ უფრო გაზარდოს სამხედრო ყოფნა შავი ზღვის რეგიონში და ჩაატაროს მეტი სწავლებები საქართველოსა და უკრაინის მონაწილეობით. ჩვენ შეგვიძლია მოლაპარაკებები გავმართოთ თურქეთთან, იმ მიზნით, რომ თუკი მოსკოვი გააგრძელებს აგრესიულ ქმედებებს და უკრაინას აზოვის ზღვაზე წვდომას არ დაუბრუნებს, ანკარამ შეზღუდოს რუსეთის გემების მოძრაობა თურქეთის სრუტეებში,“- აღნიშნა ნატო-ს გენერალური მდივნის ყოფილი მოადგილე, აშშ-ს ატლანტიკური საბჭოს საპატიო წევრმა ალექსანდრ ვერბშოუმ.