შემთხვევა, რომელიც „რუსთავი 2-ის“ ჟურნალისტმა, ახალციხეში გამართული სასამართლო პროცესის შემდეგ გადაიღო, შესაძლოა, მკვლელობაში ბრალდებულის სამართალდამცველებთან კავშირზე მიუთითებდეს.

სოფელ ფოკაში მომხდარი მკვლელობის საქმეზე ახალციხის სასამართლომ გალუსტ მკრტიჩიანს წინასწარი პატიმრობა შეუფარდა, თუმცა პროცესის დასრულების შემდეგ ბრალდებული, პოლიციის თანამშრომლებთან ერთად, ერთ-ერთ მანქანასთან შეჩერდა და იქ მყოფ პირს ელაპარაკებოდა.

„კურიერის“ ინფორმაციით, გადამღები ჯგუფის გამოჩენის შემდეგ, სამართალდამცველები, პატიმართან ერთად, ადგილიდან გაიქცნენ, უცნობმა პირმა კი საკუთარი ვინაობის გამხელა არ ისურვა. მან უარყო ინფორმაცია, რომ შინაგან საქმეთა სამინისტროს თანამშრომელია. შსს-ში კი ამბობენ, რომ ის მათი თანამშრომელია, რომელსაც სამართალდამცველებმა გარკვეული დოკუმენტაცია გადასცეს, თუმცა მას ხელში არაფერი ეჭირა.

„რუსთავი2“-ის მიერ გავრცელებულ ინფორმაციას, რომლის თანახმადაც ფოკაში მომხდარ მკვლელობაში ბრალდებული პირი,სასამართლო პროცესის შემდეგ, პოლიციის თანამშრომლებთან ერთად, ერთ-ერთ მანქანასთან შეჩერდა და იქ მყოფ პირს ესაუბრებოდა, შინაგან საქმეთა სამინისტრო უარყოფს.

"დაკავებული გ.მ.-ს ახალციხის სასამართლოდან საპატიმროში გადაყვანის დროს ავტომობილი სამსახურეობრივ-ტექნიკური მიზეზით შეჩერდა. სამცხე-ჯავახეთის პოლიციის დეპარტამენტის გამომძიებელს ხელთ ჰქონდა სამსახურეობრივი დოკუმენტაცია, რომელიც გადასცა დაკავებულის თანმხლებ პოლიციის თანამშრომლებს, რის შემდეგაც ავტომობილმა სვლა შეუფერხებლად განაგრძო. რაც შეეხება ერთ-ერთი ტელეკომპანიით გავრცელებულ ვიდეომასალას, მასშიც ნათლად ჩანს, რომ პირი, რომელიც სამინისტროს თანამშრომელია, სასამართლო განხილვამდე მიყვება დაკავებულს, ესწრება პროცესს და შემდეგ ტექნიკური მიზეზით კომუნიკაცია აქვს უკვე ქალაქის ქუჩაში მისივე თანამშრომლებთან"- აცხადებენ უწყებაში.

შეგახსენებთ, რომ მკვლელობა ფოკაში, რასაც ვითარების უკიდურესად გამწვავება მოჰყვა, 3 დეკემბერს მოხდა.