ოპოზიციურმა პარტიებმა საკონსულტაციო საბჭო შექმნეს - საარჩევნო სისტემის შესაცვლელად, 3 მოთხოვნა სახელდება

პოლიტიკა - 18:21, 05 Dec, 2018

1099

ოპოზიციური სპექტრი, ვადამდელი არჩევნების ჩატარების და საარჩევნო სისტემის შეცვლის მოთხოვნით ერთიანდება.

"ლეიბორისტული პარტიის" ოფისში გამართული კონსულტაციები, დღეს კონკრეტული შედეგით დასრულდა. შეიქმნა ოპოზიციური პარტიების საკონსულტაციო საბჭო. ქვეყანაში არსებული პოლიტიკური კრიზისის ფონზე, აუცილებელია შეიცვალოს საარჩევნო სისტემა, ასევე საარჩევნო ადმინისტრაციების დაკომპლექტების წესი, რის შემდეგაც ქვეყანაში ვადამდელი საპარლამენტო არჩევნები უნდა დაინიშნოს.

გაერთიანებული ოპოზიციის წევრი ედპ-ს ლიდერი ბაჩუკი ქარდავა ამბობს, რომ საპრეზიდენტო არჩევნებმა ნათლად დაანახა ყველას, რომ 2020 წლამდე ყველაფრის ამ პირობებში დატოვება ნიშნავს, რომ დემოკრატია დასამარებულია.

„ხელისუფლების ცვალებადობის საარჩევნო გზა არის გაუქმებული და მთელი ოპოზიცია ამას ხვდება. მთელი ოპოზიცია მინუს "ქართული ოცნება" თუ ამ ვითარებაში მათ ჰგონიათ,რომ დიდხანს გააგრძელებენ ხელისუფლებაში ყოფნას ძალიან ცდებიან,“-ამბობს ბაჩუკი ქარდავა.

„ისევე როგორც ფულით ნაყიდი სიყვარული არალეგიტიმური და უკანონოა, ასევე ფულით ნაყიდი ძალაუფლება და არჩევნები არალეგიტიმური და უკანონოა“-ამბობს პირველი ლეიბორისტი შალვა ნათელაშვილი.

მისი თქმით, მმართველმა ძალამ კარგად უნდა გააცნობიეროს როდის არის დრო მოსვლის და როდის წასვლის.

„არის დრო ქვების შეგროვებისა და არის დრო ქვების სროლისა. დღეს მათ მიმართ ქვების სროლის დრო დადგა“-ამბობს ნათელაშვილი.