"მნიშვნელოვანი ჩანაწერია, რომ არჩევნებმა გამართულად ჩაიარა - ჩუგოშვილი სახელმწიფო დეპარტამენტის დასკვნაზე საუბრობს

პოლიტიკა - 17:09, 05 Dec, 2018

912

პარლამენტის ვიცე-სპიკერი თამარ ჩუგოშვილი ამბობს, რომ ამერიკის შეერთებული შტატების სახელმწიფო დეპარტამენტის მიერ, საპრეზიდენტო არჩევნებთან დაკავშირებით გამოთქმულ კრიტიკასთან ერთად პირველ რიგში, გამოხატულია ძალიან მკაფიო მხარდაჭერა საქართველოს მიმართ.

„ამ განცხადებაში რამდენიმე აქცენტი არის გაკეთებული. პირველ რიგში, გამოხატული არის ძალიან მკაფიო მხარდაჭერა საქართველოს მიმართ. ამ განცხადებიდან ჩანს, რომ ძალიან დიდი მოლოდინი არის ახალ კონსტიტუციასთან დაკავშირებით, რომლის გამოც ჩვენ აქტიურად გვაკრიტიკებდნენ ჩვენი ოპონენტები, თუმცა ამ განცხადებიდანაც ჩანს, რომ ამ საკონსტიტუციო ცვლილებებმა მნიშვნელოვანი სიახლეები უნდა მოუტანოს ქვეყანას. მოლოდინები ამ განცხადებიდან ნათლად და მკაფიოდ იკვეთება. ასევე არის მნიშვნელოვანი ჩანაწერი, რომელიც ამბობს, რომ გამართულად ჩაიარა არჩევნებმა და ასევე ნათქვამი არის დარღვევებთან დაკავშირებით. აკვირდებიან და აქვთ მოლოდინი, რომ ახალი წლიდან უნდა დაიწყოს გარკვეული პროცესები, რაც ჩვენც განვაცხადეთ, რომ გვექნება აქტიური მუშაობა ეუთო-ს მიერ დაფიქსირებული შენიშვნების გასათვალისწინებლად კანონმდებლობაში და მომავალში, კიდევ უფრო გაუმჯობესებული საარჩევნო გარემოს შესაქმნელად. ამ ყველაფერზე, რაზეც არის განცხადებაში აქცენტები გაკეთებული, ნასაუბრები გვაქვს, ვიცით, რომ მიუხედავად იმისა, რომ არჩევნები სრულიად ლეგიტიმურად ჩატარდა, მომავალში არის ბევრი რამ გამოსასწორებელი და ეუთო-ს დასკვნიდან ყველაფერი კარგად ჩანს. სწორი მიმართულებებია მოცემული და ყველაფერი სახელმძღვანელო არის იმისთვის, რომ კიდევ უფრო გავაუმჯობესოთ კანონმდებლობა და საარჩევნო კოდექსი,“- განაცხადა თამარ ჩუგოშვილმა.