ადმინისტრაციული რესურსის უკანონო გამოყენება, ამომჩრევლის მასობრივი მოსყიდვა, შანტაჟი და უხეში ზეწოლა- გაერთიანებული ოპოზიციის ერთობლივი განცხადება საარჩევნო სისტემის რეფორმის აუცილებლობაზე

პოლიტიკა - 14:26, 05 Dec, 2018

697

გაერთიანებულმა ოპოზიციამ სხვა ოპოზიციურ პარტიებთან დღეს კონსულტაციის პირველი რაუნდი გამართა. შხვედრის დეტალებთან დაკავშრებით ოპოზიციური პარტიები განცხადებას ავრცელებენ:

„დღეს ოპოზიციურმა პოლიტიკურმა პარტიებმა იმსჯელეს საქართველოში გამართული საპრეზიდენტო არჩევნების შესახებ. პარტიების შეფასებით, არჩევნები გაიმართა საარჩევნო კოდექსის სხვა კანონებისა და ნორმების, ასევე საერთაშორისო სტანდარტების მასობრივი და უხეში დარღვევის პირობებში. სახეზეა ადმინისტრაციული რესურსის უკანონო და მასშტაბური გამოყენება, ამომჩრევლის მასობრივი მოსყიდვა, მასზე შანტაჟი და უხეში ზეწოლა, ხმის მიცემის ფარულობის დარღვევა და გაყალბება. ზემოაღნიშნული მასობრივი დარღვევები, ჩვენი შეფასებით, იძლევა საფუძველს განვაცხადოთ, რომ ამ დარღვევებმა პირდაპირი და თვისობრივი გავლენა იქონია არჩევნების შედეგებზე. ამავე დროს, მივიჩნევთ, რომ არსებული პოლიტიკური კრიზისიდან გამოსვლის მიზნით საჭიროა: პირველი - საარჩევნო სისტემის ცვლილება და შემდგომი საპარლამენტო არჩევნების სრულად პროპორციული წესით ჩატარება, მეორე - საარჩევნო ადმინისტრაციის წესის ძირეული ცვლილება და საარჩევნო გარემოს გარდაქმნა, ზემოაღნიშნული ცვლილებების შემდეგ რიგგარეშე საპარლამენტო არჩევნების ჩატარება“, - ნათქვამია ოპოზიციური პარტიების განცხადებაში.