„თუ წაგებული ჩხუბის მერე მუშტების ქნევას დაიწყებს, ეს იქნება ანარქია" - ზოიძე ვადამდელი საპარალემტო არჩევნების აუცილებლობას ვერ ხედავს

პოლიტიკა - 00:46, 05 Dec, 2018

424

გაერთიანებული ოპოზიციის შეთავაზებას, დაჯდეს ხელისუფლება მოლაპარაკების მაგიდასთან, უმრავლესობის წევრი აკაკი ზოიძე გამოეხმაურა. როგორც დეპუტატმა "არჩევანის" ეთერში თქვა, "პირველ რიგში უნდა გაერკვეს ე.წ. გაერთიანებული ოპოზიცია, ჩვენ უნდა გვლანძღონ და "გაყიდული" ეძახონ მოსახლეობას, თუ წამოვიდნენ მოლაპარაკებაზე."

აკაკი ზოიძე ამბობს, რომ აგრესიულ რიტორიკას ხელისუფლების მხრიდან ადგილი არ ჰქონია. მისი თქმით, სიძულვილის ენით საუბრობს ოპოზიცია. მისივე თქმით, ქვეყანაში არ არსებობს ვადამდელი არჩევნების ჩატარების აუცილებლობას, როგორც დეპუტატი აცხადებს, მისთვის გაუგებარია, რას გულისხმობს ოპოზიცია მოლაპარაკებებში.

„თუ წაგებული ჩხუბის მერე მუშტების ქნევას დაიწყებს ნებისმიერი შემთხვევაში წაგებული მხარე და იტყვის, რომ არა, თავიდან გადავათამაშოთ თითოეული არჩევნები, ეს დემოკრატიული საზოგადოება არ იქნებოდა, ეს იქნება ჩვეულებრივი ანარქია. შესაბამისად, რომ ყოფილიყო 1%-იანი, 2%-იანი განსხვავება, შეიძლება გვეფიქრა, რომ ლეგიტიმური არის მოთხოვნა ვადამდელ საპარლამენტო არჩევნებთან დაკავშირებით, მაგრამ არავითარ შემთხვევაში ისეთი განსხვავების შემთხვევაში, რაც ახლა მივიღეთ,“ - განაცხადა აკაკი ზოიძემ.

რაც შეეხება პროპორციულ სისტემაზე გადასვლას, ზოიძე ამბობს, რომ ეს რომ ნაციონალურ მოძრაობას სდომოდა, წინა მოწვევის პარლამენტში დაუჭერდა მხარს. უმრავლესობის წევრი აცხადებს, რომ მსგავსი შეთავაზება არაერთხელ იქნა გაკეთებული ოპოზიციისთვის, თუმცა, მათ კონსტიტუციის შემუშავებაზეც კი თქვეს უარი. მისივე თქმით, 2020 წლამდე ნაბიჯ-ნაბიჯ უნდა მივიდეს ქვეყანა იმ სისტემამდე, რომელიც სჭირდება დემოკრატიისთვის, მათ შორის ეს ეხება ბარიერის დაწევასაც. თუმცა, ასე ხელაღებით პროპორციულ სისტემაზე ქვეყანა ვერ გადავა.