„შეიძლება ერთი თვე, ორი თვე მოითმინოს ამ საზოგადოებამ, მაგრამ ერთ მშვენიერ დღეს აუცილებლად აფეთქდება"

„შეიძლება ერთი თვე, ორი თვე მოითმინოს ამ საზოგადოებამ, მაგრამ ერთ მშვენიერ დღეს აუცილებლად აფეთქდება" - ბაჩუკი ქარდავა

პოლიტიკა - 00:12, 05 Dec, 2018

914

მმართველი გუნდის უარს, მიუჯდეს მოლაპარაკებათა მაგიდას, გაერთიანებული ოპოზიციის წევრი და ედპ-ს ლიდერი ეხმაურება.

ბაჩუკი ქარდავა "არჩევანის" ეთერში არჩევნების გაყალბების მასშტაბებზე საუბრობს და ამბობს, რომ ადამიანები, რომელიც მოატყუა ოცნებამ, ოდესმე საკუთარ დამოკიდებულებას აუცილებლად გამოხატავენ. მისივე თქმით, გაერთიანებული ოპოზიცია, ფაქტობრივად, მაშველ რგოლს უგდებს მმართველ გუნდს, რომ ამ ჩიხიდან გამოვიდნენ და ისინი ამაზე უარს ამბობენ.

„შეიძლება ერთი თვე, ორი თვე მოითმინოს ამ საზოგადოებამ, როდესაც გრძნობს, რომ მას მიაყენეს შეურაცხყოფა. მაგრამ ერთ მშვენიერი დღეს, შეიძლება სულ სხვა მიზეზით, სულ სხვა საბაბით ეს ადამიანები აუცილებლად აფეთქდებიან. ამ შემთხვევაში ჩვენ კი არ ვეხვეწებით ვინმეს დიალოგს ჩვენი ინტერესებიდან გამომდინარე, ამ შემთხვევაში გაერთიანებული ოპოზიცია და მისი კონსტრუქციული ლიდერი და ამ არჩევნებში გამარჯვებული კანდიდატი, გრიგოლ ვაშაძე, რომელიც ანგარიშს უწევს საერთაშორისო თანამეგობრობას, სახელმწიფოს პერსპექტივებს, მაშველ რგოლს ესვრის ივანიშვილს და ამ ხელისუფლებას, რომ მოვიდნენ გონს და იქნებ, ზომიერ პოლიტიკურ ჩარჩოებში დავტოვოთ ეს პროცესი, რომ არ გადავიდეს ქუჩაში,“ - განაცხადა ბაჩუკი ქარდავამ და აღნიშნა, რომ ის, რაზეც მმართველი გუნდი საუბრობდა, რომ რევოლუციისთვის ემზადება ოპოზიცია, ამის პროვოცირებას თავად ქართული ოცნება ახდენს.

ბაჩუკი ქარდავას ინფორმაციით, თავის დროზე თავად ირაკლი კობახიძეს სურდა, რომ საარჩევნო სისტემა შეცვლილიყო და პროპორციულ წესზე გადასულიყო, თუმცა, მას ბიძინა ივანიშვილმა დაურეკა და მოსთხოვა, რომ "საარჩევნო კოდექსში" მაჟორიტარული სისტემა დარჩენილიყო.