საქართველოს მთავარი საკანონმდებლო ორგანოს უფლებამოსილება იზრდება და რეგლამენტში ცვლილებები შედის.

ცვლილებების თანახმად, მთავრობა პარლამენტის წინაშე ანგარიშვალდებული იქნება, უფრო ხშირად წარუდგინოს ანგარიში საქმიანობის შესახებ.

ასევე, 2019 წლიდან საკანონმდებლო ორგანოს პლენარული სხდომები არა ქუთაისში, არამედ თბილისში გაიმართება:

„პარლამენტის 6-კაციან ჯგუფს შეუძლია, ნებისმიერ თანამდებობის პირს მიმართოს კითხვით და ეს თანამდებობის პირი იქნება პასუხისმგებელი და ვალდებული, პირადად წარდგეს პარლამენტის პლენარული სხდომის წინაშე და კითხვებს უპასუხოს. ამ დოკუმენტის მეშვეობით ჩვენ რეგულარულად გვექნება მთავრობის წევრების მოსმენები არა მხოლოდ კომიტეტებში, არამედ პლენარულ სხდომათა დარბაზში. არ გვექნება არცერთი სასესიო კვირა, როდესაც მთავრობის წარმომადგენლები პარლამენტის სხდომაზე წარმოდგენილები არ იქნებიან,“- განაცხადა პარლამენტის ვიცე-სპიკერმა, თამარ ჩუგოშვილმა.

ახალი ცვლილებების თანახმად, მთავრობის მეთაური, პრემიერ-მინისტრი ვალდებული იქნება წელიწადში ერთხელ პარლამენტს ანგარიში წარუდგინოს:

„საკომიტეტო ფარგლებში, სადაც უმცირესობაც არის, უმრავლესობაც არის, ამ ფორმატში ხდება მთავრობის დაბარება, კვორუმი არის ძალიან დაბალი. რამდენიმე დეპუტატს შეუძლია, დააყენოს საკითხი მთავრობის წევრების დაბარების თაობაზე და ეს არის შესაძლებელი,“- განაცხადა იურიდიულ საკითხთა კომიტეტის თავმჯდომარემ, ეკა ბესელიამ.