"ეს იყო უმაღლესი თანამდებობების პირების დაკვეთა...მათ შეასრულეს ეს დავალება განათლების მინისტრისგან" - მე-6 საჯარო სკოლის დირექტორის შვილის სკანდალური განცხადება

პოლიტიკა - 12:52, 04 Dec, 2018

1952

ზუგდიდის მე-6 საჯარო სკოლის დირექტორის, ია კერზაიას, ოჯახი იმ ადამიანის ვინაობის გასაჯაროებასაც ითხოვს, რომელმაც სამინისტროს ანონიმური წერილით მიმართა და რომლის საფუძველზეც დაიწყო უკვე სკოლის დირექტორის დევნა.

„მივმართავ სამართალდამცველ ორგანოებს, პროკურატურას, არასამთავრობო ორგანიზაციებს, საერთაშორისო ორგანიზაციებს, დიპლომატიური კორპუსს, ყველა გზას, რომ დაისაჯოს ყველა დამნაშავე, რომლებმაც შეუკვეთეს და განახორციელეს ეს სადისტური აქტი.

ეს იყო, როგორც მინიმუმ, უმაღლესი თანამდებობების პირების დაკვეთა, იყო გადაწყვეტილება, რომ სხვა დაწესებულებების ხელმძღვანელთა დასაშინებლად უნდა ყოფილიყო ეს მეორე ტურამდე, მათ შეასრულეს ეს დავალება განათლების მინისტრისგან, ხოლო განათლების მინისტრმა საიდან მოიტანა და ვისგან მიიღო დაკვეთა იმედია გაარკვევს საზოგადოება,“-ამბობს ია კერზაიას შვილი ბაჩანა შენგელაია,.

თავად ია კერზაია, რომელმაც პოლიტიკური ზეწოლის შედეგად ინსულტი მიიღო ამ დრომდე საავადმყოფოში რჩება, ექიმის განცხადებით, მისი მდგომარეობა მძიმე, თუმცა სტაბილურია.

ია კერზაიას ოჯახის წევრების განცხადებით, კერზაიას სალომე ზურაბიშვილის საარჩევნო კამპანიაში ჩართვასა და ზურაბიშვილისთვის მხარდამჭერთა მობილიზებას ავალებდნენ, უარის შემდეგ კი დირექტორი სამსახურიდან გაათავისუფლეს და ემუქრებოდნენ სისხლის სამართლისა და სხვადასხვა სახის პასუხისმგებლობების დაკისრებით, რამაც მისი ჯანმრთელობის მდგომარეობის უკიდურესად გაუარესება გამოიწვია.