"როდესაც უცხო ქვეყნის მოქალაქეები ჯგუფურად ფლობენ იარაღს, ყველა სახის ეჭვი შეიძლება გაჩნდეს"- შს მინისტრი უკრაინის მოქალაქეების დაკავების საკითხზე პირველ კომენტარს აკეთებს

პოლიტიკა - 12:03, 04 Dec, 2018

891

შინაგან სამეთა მინისტრი, გიორგი გახარია უკრაინის 6 და საქართველოს ერთი მოქალაქის დაკავების ფაქტზე პირველ კომენტარს აკეთებს.

გახარია ამბობს, რომ გამოძიებამ უნდა დაადგინოს რა მიზნით იმყოფებოდნენ უკრაინელი მებრძოლები საქართველოში და რაში სჭირდებოდათ ის იარაღი და საბრძოლო მასალა, რომელიც მათი დაკავებისას ამოიღეს.

რაც შეეხება ვერსიას დაკავებულების რომელიმე ოპოზიციურ ძალასთან კავშირის შესახებ. შს მინისტრი აცხადებს, რომ ეჭვების დონეზე შეიძლება ამ საკითხზე საუბარი.

"როდესაც უცხო ქვეყნის მოქალაქეები კონცენტრირებულად, ჯგუფურად... შემდგომ უკვე ოპერატიული ინფორმაციის საფუძველზე აღმოვაჩინეთ იარაღი, აქ შეიძლება ყველა სახის ეჭვი გაჩნდეს. თუმცა დღეს ჩვენ არაფერზე ვსაუბრობთ. ჩვენ ვსაუბრობთ იმ სისხლის სამართლის საქმეზე, რომელიც არის მიმდინარე. ჩვენ კოლეგებთან, უსაფრთხოების სამსახურთან ერთად ვმუშაობთ და ვნახოთ, რა შედეგები იქნება...

ეს არის საპასუხისმგებლო გამოძიება. ჩვენ თითოეულ ნაბიჯს და სიტყვას ვზომავთ. რა თქმა უნდა, არსებობს გარკვეული ეჭვები მათივე განცხადებებიდან, რომელიც მათ გააკეთეს, მათ შორის დაკითხვების დროს, მათივე ვიზიტებიდან სხვადასხვა აქციებზე, მათ შორის თბილისში. ასეთი ეჭვი არსებობს, თუმცა ეს დღეს მხოლოდ ეჭვია და სად მიგვიყვანს გამოძიება ვნახავთ. დღეის მდგომარეობით გამოძიება მიმდინარეობს მოტივის გამოსაკვეთად. როგორც ფაქტი, ჩვენ გვაქვს ამოღებული ცეცხლსასროლი იარაღი, რომელიც ჰქონდათ ჯგუფურად საქართველოში ჩამოსულ უკრაინის მოქალაქეებს", - განაცხადა გიორგი გახარიამ.

თბილისში ლიხაურის ქუჩაზე ჩატარებული სპეცოპერაციისას უკრაინის 6 და საქართველოს ერთი მოქალაქე დააკავეს.

მათ ბრალად იარაღისა და საბრძოლო მასალის უკანონო-შეძენა შენახვა ედება.