"ეს იყო პოლიტიკური ანგარიშსწორება, ის დასაჯეს იმისთვის, რომ ის არ იყო აქტივისტი" - ბაჩანა შენგელია დედამისის წინააღმდეგ დაწყებულ რეპრესიებზე საუბრობს

პოლიტიკა - 09:50, 04 Dec, 2018

1042

ზუგდიდის 6-ე საჯარო სკოლის დირექტორის ჯანმრთელობის მდგომარეობა ისევ მძიმეა. ია კერზაია ამ დრომდე მართვითი სუნთქვის აპარატზეა მიერთებული.
კერზაიას შვილი, ბაჩანა შენგელია პროკურატურისგან ფაქტის გამოკვლევას ითხოვს.

მისი თქმით, საგამოძიებო უწყებამ უნდა დაადგინოს რა საფუძველი არსებობდა დირექტორის სკოლიდან გათავისუფლების.

შენგელია პოლიტიკურ ანგარიშსწორებაზე, მიზანმიმართული ზეწოლაზე და ტერორზე საუბრობს.

ხელისუფლებამ კერზაიას წინააღმდეგ შეტევა მას შემდეგ დაიწყო რაც მან ზურაბიშვილის საარჩევნო აგიტაციაში ჩართვაზე უარი თქვა.

„ეს იყო პოლიტიკური ანგარიშსწორება და ის დასაჯეს იმისთვის, რომ ის არ იყო აქტივისტი. მხარდამჭერზე ვერ ვიტყვი იმიტომ, რომ ის არანაირი, არც ერთ ხელისუფლების და არც ერთი პარტიის მხარდამჭერი საჯაროდ არ ყოფილა. ეს სტრესი და ეს წნეხი იყო ხელისუფლების მხრიდან, ამ შემთხვევაში განათლების სამინისტროს მხრიდან. ვეცდები, რომ ყველა ინსტანციაში, ნებისმიერ სამართალდამცავ ორგანოში, სასამართლოში, პროკურატურაში, სახალხო დამცველთან, დავამტკიცოთ ეს არაადამიანური ქმედება,“-განაცხადა ბაჩანა შენგელიამ.

შენგელია მომხდარის შესახებ ინფორმაციას მიაწვდის სახალხო დამცველს, არასამთავრობო ორგანიზაციებსა და საელჩოებსაც.