ქუთაისის აეროპორტში თაკო ჩარკვიანსა და მის მეუღლეზე მომხდარ თავდასხმას დღეს გაერთიანებული ოპოზიციის რიგებიდან გამოეხმაურნენ. კერძოდ, კომენტარი გაკეთდა აღნიშნულ ინციდენტზე დედაქალაქის მერის განცხადებასთან დაკავშრებით, კალაძის განცხადებით „რასაც დასთეს, იმას მოიმკი“.

„ეროვნულ დემოკრატიული პარტიის“ ლიდერის ბაჩუკი ქარდავას განცხადებით, ხელისუფლება უპასუხისმგებლოდ უქცევა:

„ამ დღეებს თუ გადავხედავთ, დავინახავთ, რომ გაერთიანებული ოპოზიცია, საქართველოს პოლიტიკურ ძალთა ერთობა, ძალიან მაღალი პასუხისმგებლობით იქცევა თავისი მხარდამჭერების და არა მხოლოდ მათ წინაშე. არამედ იმ ადამიანების წინაშეც, ვინც მხარი არ დაუჭირა გაერთიანებულ ოპოზიციას. უპასუხისმგებლოდ იქცევა ჩვენი ხელისუფლება, რომელიც განძარცვულია ლეგიტიმაციისგან, როდესაც სჩადის ასეთ რამეებს, ჩვენ, პოლიტიკოსები, შეიძლება ბევრ რამეს ვართ შეჩვეული, მაგრამ როდესაც ზეწოლა ხდება ჩვენს მხარდამჭერებზე, თუნდაც ლიდერებზე, საზოგადოებიდან, რომლებმაც აქტიურად დაუჭირეს მხარი ამ არჩევნების პერიოდში სწორედ დვლილებებს, ამის გაგრძელების საშუალებას არავის მივცემთ. უნდა იცოდეს ხელისუფლებამ და ჩვენმა მხარდამჭერებმაც, რომ ჩვენ ვართ მობილიზებულები, უშუალოდ საგანგებო რეჟიმში, უფრო მეტად ვართ ჩართულები პროცესებში, ვიდრე ეს იყო წინასაარჩევნო პერიოდში, ვემზადებით 16 დეკემბრისთვის და ყოველდღიურ რეჟიმში, ნებისმიერი ზეწოლის ფაქტი, ჩვენი მხრიდან იქნება პასუხგაცემული, რა თქმა უნდა გაცემული კანონის ფარგლებში“, - განაცხადა ბაჩუკი ქარდავამ.