საქართველოს მთავრობა მორიგ საერთაშორისო სკანდალში ეხვევა - რადას დეპუტატი საქართველოს ხელისუფლებას უკრაინის მოქალაქეებისთვის იარაღის ჩადებაში ადანაშაულებს

პოლიტიკა - 15:15, 03 Dec, 2018

1932

უკრაინის რადას დეპუტატი, სიმიონ სემენჩენკო სკანდალურ განცხადებას აკეთებს საქართველოს ხელისუფლებას უკრაინის მოქალაქეებისთვის იარაღის ჩადებაში ადანაშაულებს.

რადას გავლენიანი დეპუტატი აღნიშნავს, რომ ტურისტული მიზნით ჩამოსულ უკრაინის მოქალაქეებს იარაღი ჩაუდეს და ეს პროვოკაცია კონკრეტული პოლიტიკური მიზნებისთვის გამოიყენეს.

„ეს არის პროვოკაცია. აბსოლუტურად დარწმუნებული ვარ, რომ იარაღი ჩადებულია. რამდენიმე ვერსია მაქვს, პირველი კი ის არის, რომ დიდი ალბათობით საქართველოს და უკრაინის უწყებები ერთმანეთთან თანამშრომლობენ, რადგან აწყობთ აწყობთ სკანდალის გამოწვევა, ქართველი ამომრჩევლის დაშინება, რომ ჩამოვიდნენ ვიღაც მებრძოლები უკრაინიდან საზარელი მიზნებით. ეს ადამიანები, რომლებიც აქ დააკავეს, უკრაინაში ოპოზიციაში არიან და კორუფციას აპროტესტებენ, ითხოვენ ანტიკორუფციული სასამართლოს შექმნას, ისინი იბრძვიან უკეთესი ქვეყნისთვის. კიდევ ერთხელ ვაცხადებ, რომ ბიჭებს, რომლებიც აქ ჩამოვიდნენ პოლიტიკასთან არანაირი კავშირი არ აქვთ,“ - განაცხადა სიმონ ისმნჩენკომ.

6 უკრაინის მოქალაქე და ერთი ქართველი მებრძოლი ლუკა ჩხეტია, ქართველმა სამართალდამცავებმა თბილისში ჩატარებული სპეცოპერაციის შედეგად დააკავეს.

შინაგან საქმეთა სამინისტროს ინფორმაციით, სპეცოპერაცია გამთენიისას ლიხაურის ქუჩაზე ჩატარდა.

დაკავებულები არიან უკრაინის მოქალაქეები: ო.ნ., რ.მ., დ.კ. ი.კ., ი.ო., ს.კ. და საქართველოს მოქალაქე ლ.ჩ. მათ ბრალი ჯგუფურად იარაღის, საბრძოლო მასალის, ფეთქებადი მოწყობილობის უკანონო შეძენა-შენახვისთვის წაუყენეს.

შსს-ს განცხადებით, გამოძიება მიმდინარეობს ამ პირების საქართველოში ჩამოსვლის მიზნებზე და ცდილობს დაადგინოს, არის თუ არა კავშირში „ქვეყანაში მიმდინარე პოლიტიკურ პროცესებთან“.

ლუკა ჩხეტიას ოჯახი დარწმუნებულია, რომ მას იარაღი ჩაუდეს. ლუკა ჩხეტიას ოჯახი მის გათავისუფლებას ითხოვს.

შს სამინისტროს ინფორმაციით, სასტუმროს ნომრების ჩხრეკისას ამოღებულია ბერეტას და მაკაროვის სისტემის ცეცხლსასროლი პისტოლეტი, ავტომატური ხელნაკეთი ცეცხლსასროლი იარაღი და სხვადასხვა სახის საბრძოლო მასალა.

ამ ეტაპზე გამოძიება დაწყებულია საქართველოს სსკ-ის 236-ე მუხლის მე-3 და მე-6 ნაწილებით, რაც ჯგუფურად ცეცხლსასროლი იარაღის, საბრძოლო მასალის, ფეთქებადი მოწყობილობის მართლსაწინააღმდეგო შეძენა-შენახვას გულისხმობს.