საპრეზიდენტო არჩევნები 2018 – „პატრიოტთა ალიანსის“ ლიდერი ირმა ინაშვილი მთავარ პროკურატურასა და შინაგან საქმეთა სამინისტროს მიმართავს მოხდეს გაერთიანებული ოპოზიციის მიერ არჩევნებზე მიღებული ხმების რაოდენობაზე გამოძიება.

ინაშვილის განცხადებით, არსებობს სერიოზული კითხვის ნიშნები იმასთან დაკავშირებით, თუ როგორ მიიღო ოპოზიციურმა პარტიამ აღნიშნული რაოდენობის ხმები.

"რაც არ უნდა გაბერონ მონაცემები, დაახლოებით 3000 ადამიანი მონაწილეობდა. ახლა გადავდივარ კონკრეტული შეკითხვების დასმაზე - შეკითხვა პირველი - თუ პარტიას რეალურად ჰყავს 780 ათასი ამომრჩეველი, მის მიერ ორგანიზებულ აქციაზე, რატომ მოდის 3 ათას კაცზე ნაკლები. შეუძლებელია 780 ათასი ამომრჩეველი და შენს მიერ ორგანიზებულ მიტინგზე არ იდგეს მინიმუმ 30 ათასი მხარდამჭერი. ყველას ესმის ეს რომ ასეა და დიდი ფილოსოფია ამას არ სჭირდება.

რეალურად "ნაციონალურ მოძრაობას" ერთი და იგივე აქტივი ჰყავს, რომელსაც ჩვენ ვხედავთ ხან ფილარმონიის დარბაზში, ხან ვხედავთ პარლამენტის შენობასთან აქციაზე.

ამიტომ დღეს მე როგორც საქართველოს პარლამენტის წევრი ვითხოვ, საქართველოს პროკურატურამ და შს სამინისტრომ, სასწრაფოდ დაიწყოს გამოძიება "ნაციონალური მოძრაობის" თითქოსდა 780 ათასი ამომრჩევლის რეალურობის დადგენის მიზნით. პირდაპირ და მკაფიოდ ვამბობ, ადგილი აქვს პოლიტიკურ აფერისტობას და ამ აფერისტობაში მონაწილეობს, როგორც სააკაშვილ-ბოკერია, ისე მონაწილეობენ "ქართული ოცნების" ხელისუფლებიდან კონკრეტული თანამდებობის პირები,"-განაცხადა ირმა ინაშვილმა.