გაერთიანებული ოპოზიციის წარმომადგენლებსა და მათ მხარდამჭერებზე დღეს განხორციელებულ თავდასხმების ფაქტებზე „ძალა ერთობაშიას“ რიგებში გამოეხმაურნენ. გიორგი ვაშაძემ დღეს გამართულ ბრიფინგზე „ქართულ ოცნებას“ და მმართველ გუნდს მიმართა:

„მინდა მივმართო „ქართული ოცნების“ ლიდერებს, ცოტა დაოკდით და დააოკეთ თქვენი ზონდერბრიგადები, რომლებიც დაძრწიან ახლა ქუჩებში. ერთი მოწოდება მაინც გააკეთეთ, რომ მოუწოდოთ მშვიდობისკენ თქვენ ამ კრიმინალებს, რომლებიც თქვენთან ერთად დარბოდნენ საარჩევნო უბნებზე. ელემენტარულად ერთხელ მაინც, პასუხისმგებლობა იგრძენით, რომ გვაქვს საქმე ძალიან მნიშვნელოვან პროცესთან და ძალიან დაძაბული არის მდგომარეობა ქვეყანაში. ერთხელ მაინც გაიაზრეთ, რომ ჯერკიდევ ხართ ხელისუფლებაში და ჯერკიდევ გაქვთ ვალდებულებები ქართველი ხალხის და საზოგადოების წინაშე. ჩვენ ვაკეთებთ ყველაფერს იმისთვის, რომ მსგავსი პერსონალური ინციდენტები და დაპირისპირებები არ მოხდეს. სამწუხაროდ თქვენ, ისევ და ისევ ამართლებთ და აპრავებთ მოქმედებებს, რომლებსაც თქვენი ზონედერები აკეთებენ საქართველოს მასშტაბით.

ამიტომ, მოვითხოვთ, დაუყოვნებლივ გააკეთეთ განცხადება ამ საკითხებთან დაკავშრებით, აზრი დაალაგეთ და ნორმალურად ელაპარაკეთ ხალხს და საზოგადოებას.

რაც შეეხება ჩვენს სამოქმედო გეგმებს, აბსოლუტურად მშვიდობიანად, ხვალ, რუსთაველზე სამ საათზე, ჩვენი კონსტიტუციური უფლებებიდან გამომდინარე ვიკრიბებით, სადაც კიდევ ერთხელ დავაყენებთ მოთხოვნებს, რომელიც ჩვენ გვაქვს იმ მოპარულ არჩევანთან დაკავშირებით, რომელიც განახორიცელა „ქართულმა ოცნებამ“ და იმ სპეცოპერაციასთან დაკავშირებით, რასაც ერქვა სახელად არჩევნები, თუმცა, არფერი არ ჰქონდა საერთო არჩევანთან. დიახ, გვექნება კონკრეტული მოთხოვნები და აქვე მოგმართავთ პირდაპირ ეთერში, „ქართული ოცნების“ ლიდერებს, თუნდაც პირადად ბატონ ივანიშვილს თუ ნებისმიერ სხვას, თქვენი განცხადებები, რაც ისმის არჩევნების შემდეგ, ვფიქრობ, რომ არის მოკლებული ყოველგვარ რაციონალურ აზრს. საზოგადოება არის გაყოფილი. ახლა არის გასაკეთებელი ყველაფერი იმისთვის, რომ ეს ორი მხარე რამენაირად შეთანხმებულად მოქმედებდეს. ამიტომ, რაციონალურად დაფიქრდით და მერე გაეცით პასუხი იმ მოთხოვნებს, რომელსაც ვაყენებთ ჩვენ. ჩვენ ამ შემთხვევაში ვსაუბრობთ 800 ათასზე მეტი ადამიანის სახელით, რომლებმაც მხარი დაგვიჭირეს ამ არჩევნებში, მიუხედავად თქვენი ზეწოლისა, წნეხისა და იმ უბედურებისა, რაც ჩაატარეთ ქვეყანაში და ძალიან პასუხისმგებლობით ვექცევით ამ მხარდაჭერას. ძალიან კარგად გვაქვს გააზრებული, რომ ვართ პასუხისმგებლიანი პოლიტიკური ძალები, გაერთიანებულ ოპოზიციაში, რომლებიც აგრძელებენ პოლიტიკურ ბრძოლას. ამიტომ, ნაცვლად იმისა, რომ გამოდიოდეთ და ამბობდეთ, რომ ყველაფერი თქვენია ამ ქვეყანაში და ასე შემდეგ, სჯობს დაფიქრდეთ განცხადებებზე და ადეკვატური პასუხი იყოს ნებისმიერ იმ პროცესზე, რაც ხდება ქვეყანაში.

ჩვენი კონსტიტუციური უფლებიდან გამომდინარე, ხვალ ვიკრიბებით რუსთაველზე, მოვუწოდებ ყველა ადამიანს, მშვიდობიანი მანიფესტაცია ჩავატაროთ ხვალ, იმისთვის, რომ კარგად დაფიქსირდეს, რაში მდგომარეობს ჩვენი მოთხოვნები“, - განაცხადა გიორგი ვაშაძემ.