ქუთაისის აეროპორტში პოლიტიკური ნიშნით თაკო ჩარკვიანსა და მის მეუღლეზე თავდასხმის ფაქტს, გაერთიანებული ოპოზიციის რიგებშ გამეოხმაურნენ. დღეს გამართულ ბრიფინგზე გრიგოლ ვაშაძემ განაცხადა, რომ მომხდარი არ არის ერთეული შემთხვევა და ეს დაშინების კამპანია არის ხელისუფლების მიერ მართული:

„28 ნოემბერს გავიღვიძეთ კრიმინალურ ზონაში, სადაც აღარც პოლიტიკური პროცესია, აღარც კონსტიტუციაა, აღარც არჩევნები ტარდება და ყველაფერს განაგებენ სუს-ის მიერ ორგანიზებული კრიმინალების ბანდები. დღეს თაკო ჩარკვიანს და მის ოჯახს ქუთაისში თავსდაესხნენ გალიებიდან გამოშვებული ბანდერლოგები და მიაყენეს ოჯახს ფიზიკური შეურაცხყოფა. ეს არის ორგანიზებული კამპანია, არ გეგონოთ, რომ ეს იყო რაღაც იზოლირებული მოვლენა. მიზანმიმართულად, დილიდან ელოდებოდნენ ოჯახს აეროპორტში სპეციალურად, ეს დაშინების კამპანია არის მართული ეგრეთ წოდებული ხელისუფლების მიერ, პოლიტიკური პოლიციის მიერ, რომელიც თავის თავს სუს-ს ეძახის და მასთან შეზრდილი კრიმინალების მიერ.

მინდა გითხრათ, რომ თქვენი არავის ეშინია, მინდა გითხრათ, რომ ყველა გეგმა, რაც ჩვენ დასახული გვაქვს, აუცილებლად განვახორციელებთ, არც ერთ ჩვენს მხარდამჭერს, შტაბის არც ერთ აქტივისტს, არც ერთი შტაბის ხელმძღვანელს არავის, ვინც ჩვენ კამპანიასთან იყო დაკავშირებული, ან არც ერთ ჩვენს ამომრჩეველს, რომელმაც ჩვენ ხმა მოგვცა, არ მოგცემთ უფლებას, რომ ეს ადამიანები დააშინოთ, ან მათ ფიზიკური შეურაცხყოფა მიაყენოთ და ყველა ასეთ ფაქტს მივიტანთ არასამთავრობო ორგანიზაციებთან და საერთაშორისო თანამეგობრობასთან და დამიჯერეთ, მე ამის საშალება მაქვს, ჩვენ კანონმორჩილი ხალხი ვართ, ვრჩებით კონსტიტუციის და კანონმდებლობის ფარგლებში, იმავეს მოვითხოვთ ეგრეთ წოდებული ხელისუფლებისგან, ნუ დაკარგავთ საბოლოოდ ადამიანის სახეს.

არჩევნები მოიპარეთ, ხალხის ნებას მიაფურთხეთ, უამრავი ბიულეტენი არის გაუქმებული, კალათებით ყარეთ ბიულეტენები საარჩევნო ყუთებში, ის მაინც ეცადეთ, რომ დარჩეთ ქართველობის და ადამიანობის ფარგლებში და ქალზე მაინც არ აღმართოთ ხელი.

ეს კამპანია თუ გაგრძელდა, მინდა გითხრათ, რომ ჩვენ შეშინებით ვერ შეგვაშინებთ და თქვენ ამ კამპანიის მართვას ვერ შეძლებთ, იმიტომ რომ არავის, არასოდეს კრიმინალების მართვა არ გამოსვლია და არც თქვენ გამოგივათ, ყველაფერზე მიიღებთ საკადრის პასუხს, მაგრამ მიიღებთ პასუხს ისე, როგორც ეს ცივილიზებულ ძალას შეეფერება, რომელიც ჩვენ ვართ და თქვენ გასული ხართ ცივილიზებულობის, კონსტიტუციურობისა და სამართლის ფარგლებს გარეთ“, - განაცხადა გრიგოლ ვაშაძემ.