შინაგან საქმეთა სამინისტრომ „კურიერის“ გადამღებ ჯგუფზე მომხდარი თავდასხმის გამო, გამოძიება სამი მუხლით დაიწყო - ჟურნალისტურ საქმიანობაში ხელის შეშლა, სხვისი ნივთის დაზიანება და ოფისში უკანონო შეღწევა.

ბოლო მუხლი სავარაუდოდ სწორედ „რუსთავი 2“-ის გადამღებ ჯგუფს უკავშირდება, რომელსაც ნანა კაკაბაძემ და მისი მოძრაობის წევრებმა ფიზიკური და სიტყვიერი შეურაცხყოფა მიაყენეს.

კურიერის გადამღებ ჯგუფზე თავდასხმის საქმეზე, ადეკვატურ და დროულ გამოძიებას მოითხოვს ჟურნალისტური ეთიკის ქარტია, რომელმაც დღეს საგანგებო განცხადებაც გაავრცელა.

„კურიერის“ გადამღებ ჯგუფს ნანა კაკაბაძე და მისი ორგანიზაციის წევრები ფიზიკურად გაუსწორდნენ.

„საქართველოს ჟურნალისტური ეთიკის ქარტია მიმართავს სამართალდამცავ ორგანოებს, დროულად გამოიძიონ ეს საქმე და საზოგადოებას მიაწოდონ ინფორმაცია გამოძიების შედეგების შესახებ. ყოველი ასეთი შემთხვევის უყურადღებოდ დატოვება და დამნაშავე პირების დაუსჯელობა ახალისებს ძალადობას ჟურნალისტების წინააღმდეგ და აუარესებს სამუშაო გარემოს.

არასამთავრობო ორგანიზაციები, ისევე როგორც საჯარო უწყებები, დაინტერესებულნი უნდა იყვნენ უზრუნველყონ გამჭირვალობა და ითანამშრომლონ მედიასთან. ამასთან, მათ ხელი უნდა შეუწყონ მედიის წარმომადგენელთა პროფესიული საქმიანობის თავისუფლად განხორციელებას.

იმ შემთხვევაში, თუ ჟურნალისტი პროფესიული ეთიკის წესებს ან/და კანონით დადგენილ მოთხოვნებს დაარღვევს, ამისთვის არსებობს ცივილური ფორმები. დაუშვებელია ძალადობა და თავდასხმა,“ - აღნიშნულია განცხადებაში.