საქართველოში ჩატარებული საპრეზიდენტო არჩევნების მეორე ტურის ეგზიტპოლები ცხადყოფს, რომ მმართველი პარტია "ქართული ოცნების" მიერ მხარდაჭერილი სალომე ზურაბიშვილი საპრეზიდენტო არჩევნებში უგებს ერთიანი ოპოზიციის კანდიდატს გრიგოლ ვაშაძეს, - წერს BBC სტატიაში: Georgia election: Salome Zurabichvili in the lead - polls.

"ქალბატონი ზურაბიშვილი მხარს უჭერს საქართველოს დაბალანსებულ ურთიერთობას რუსეთთან და დასავლეთთან, ხოლო გრიგოლ ვაშაძე, რომელიც საქართველოსა და რუსეთს შორის 2008 წლის კონფლიქტის დროს საგარეო საქმეთა მინისტრი იყო, უფრო პროდასავლურია.

ეს არის ბოლო საპრეზიდენტო არჩევნები, როდესაც პრეზიდენტი პირდაპირ აირჩევა საქართველოში, რომელიც საპარლამენტო მმართველობაზე გადადის, გასული წლის კონსტიტუციური რეფორმის შემდეგ, ოპოზიციის პროტესტის მიუხედავად.

თუმცა, ეს არჩევნები განიხილება ასევე იმის მაჩვენებლად, თუ როგორ შეიძლება წარიმართოს საპარლამენტო არჩევნები 2020 წელს.

დასავლეთის ქვეყნები ასევე აკვირდებიან არჩევნებს იმ ქვეყანაში, რომელიც ევროკავშირისა და NATO-ს წევრობისკენ მიისწრაფის.

ოპოზიცია ასაჩივრებს, რომ ხდებოდა საარჩევნო კანონის დარღვევები და მათ აქტივისტებზე თავდასხმა, მაგრამ ეს ფაქტები უარყოფილია მმართველი პარტიის მიერ. საერთაშორისო დამკვირვებლები აცხადებენ, რომ არჩევნების პირველი ტური ტარდებოდა არათანაბარ პირობებში," - წერს BBC.