გაერთიანებული ოპოზიციის საპრეზიდენტო კანდიდატის, გრიგოლ ვაშაძის საარჩევნო შტაბის ხელმძღვანელის გიორგი ვაშაძის განცხადებით, ეგზიტპოლების შედეგები 17:00 საათის მონაცემებს წარმოადგენდა, 20:00 საათამდე კი ამომრჩევლებს მაღალი აქტივობა დაფიქსირდა, ამიტომ აუცილებელია ყველა ხმის დაცვა. ვაშაძის ინფორმაციით ბოლო სამ საათში 300 ათასამდე ამომრჩეველი მივიდა საარჩევნო უბნებზე:

„ჩვენ, როგორც იცით, აწყობილი გვაქვს ხმების პარალელური დათვლის სისტემა, შემოვიდა მონაცემები, რომლის მიხედვითაც კიდევ ერთხელ ჩანს, რომ თითოეულ ხმას აქვს გადამწყვეტი მნიშვნელობა და მოვუწოდებთ ყველა ჩვენ მხარდამჭერს, გავამაგროთ უბნები და დავიწყოთ მონაცემების დაცვა მაქსიმალურად.

წალკა მე-14 უბანი გაიმარჯვა გრიგოლ ვაშაძემ - 30 ხმა, 15 - სალომეს, დმანისი 36 -ე უბანი ვაშაძე - 101 სალომე - 61, ბოლნისი 45-ე უბანი გაიმარჯვა ვაშაშემ, დმანისი 42-ე უბანი ვაშაძე - 90, სალომე - 37, მარნეულის მე-12 და 46-ე უბნები გაიმარჯვა ვაშაძემ, ბოლნისი 45-ე უბანი გაიმარჯვა ვაშაძემ, გაჩიანის მე-11 უბანი ვაშაძე - 182, სალომე - 83.

მინდა, ხაზი გავუსვა, რომ იმ უბნებში, სადაც პირველ ტურში წავაგეთ, ამავე უბნებში ახლა მოგებული გვაქვს.

თითოეულ ხმას ვითვლით, თითოეულ ოქმს ველოდებით, იმ უკიდურესად მძიმე გარემოში, რაშიც მიმდინარეობდა მეორე ტური და არჩევნების დღე, ტოტალური მოსყიდვა და არჩევანის თავისუფალი ნების გამოხატვაზე ზეგავლება, საკმაოდ საინტერესო შედეგები გველოდება წინ. შეგახსენებთ, რომ ეგზიტპოლები იყო 5 საათის შედეგები, 5-დან 8 საათამდე იყო ძალიან მაღალი აქტივობა. ჩვენი მონაცემებით დაახლოებით 300 ათასამდე ამომრჩეველი მოვიდა დამატებით, ასე რომ ყველაფერი წინ არის, კიდევ ერთხელ მოვუწოდებ ყველა ჩვენ მხარდამჭერს მაქსიმალურად გავამაგროთ საარჩევნო უბნები და ოქმის წამოღებამდე არ მოვეშვათ.“- განაცხადა გიორგი ვაშაძემ.