საპრეზიდენტო არჩევნები 2018 და მეორე ტურის მიმდინარეობისას დაფიქსირებული დარღვევები - გაერთიანებული ოპოზიციის საარჩევნო შტაბის ხელმძღვანელმა ბრიფინგი გამართა და ვაკის მეორე უბანზე დაფიქსირებულ ყალბ დოკუმენტებთან დაკავშრებით არსებულ ინფორმაციაზე ისაუბრა. ვაშაძის თქმით, ერთი-ერთი მოქალაქე ვაკის მეორე საარჩევნო უბანზე ყალბი პირადობის მოწმობით ცდილობდა ხმის მიცემას. საარჩევნო უბნის დამკვირვებელმა ბრიფინგზე აღნიშნა, რომ მოქალაქე დავით შენგელიამ წარადგინა ლამინირებული პირადობის მოწმობა, რომელზეც დატანილი სურათი და სამაგიდო სიის სურათი შეუსაბამო იყო.

„როდესაც დავსვი შეკითხვა, თუ რატომ არის ასეთი აცდენა სამაგიდო სიის და პირადობის მოწმობას შორის, ამან გამოიწვია ძალიან დიდი აგრესია კომისიის მდივნის და თავმჯდომარის მხრიდან. რეგისტრატორმა, პრაქტიკულად, წამართვა ხელიდან ეს პირადობის მოწმობა და სასწრაფოდ მისცეს ბიულეტენი ამ ადამიანს და ჩააგდებინეს ყუთში. ხოლო კომისიის თავმჯდომარემ განაცხადა, რომ მისი პრეროგატივა იყო, გადაეწყვიტა, ადამიანი ხმას მისცემდა თუ არა,“ - განაცხადა დამკვირვებელმა.

დამკვირვებლის თქმით, ქართული ოცნების მიერ გავრცელებული ინფორმაცია, რომ მამა-შვილს ერთი და იგივე სახელი აქვს და ამ ინციდენტში სწორედ ისინი მონაწილეობდნენ, სიმართლეს არ შეესაბამება.

„ამ ადამიანს ახლდა ვიღაც ახალგაზრდა, რომელიც ძალიან აგრესიულად იმეორებდა, რომ იყო მისი მეზობელი და კარგად იცნობდა იმ პიროვნებას, იქ შვილი არავინ ყოფილა,“ - განაცხადა დამკვირვებელმა.