არჩევნების სავარაუდო გაყალბება - საია მარნეულის 49-ე უბანზე კენჭისყრის შეწყვეტას და შედეგების ბათილობას ითხოვს

პოლიტიკა - 17:21, 28 Nov, 2018

922

საქართველოს ახლაგაზრდა იურისტთა ასოციაცია მარნეულის 49-ე უბანზე კენჭისყრის შეწყვეტას და შედეგების ბათილობას ითხოვს.

სულხან სალაძემ საკითხზე საგანგებო ბრიფინგზე ისაუბრა.

„საია მარნეულის 49-ე უბანზე კენჭისყრის შეწყვეტას და შედეგების ბათილობას ითხოვს. მარნეულის 49-ე უბანზე დაფიქსირდა სავარაუდო გაყალბების რამდენიმე ფაქტი, მათ შორის, ერთი და იგივე ამომრჩევლის მიერ ხმის განმეორებით მიცემის ფაქტი.

საია-ის დამკვირვებლის ინფორმაციით, 49-ე უბანზე ხმა მისცა ამომრჩეველმა, სანან ბადაოვმა, რომელიც ამ უბნის ამომრჩეველი არ არის. საია-ის დამკვირვებლის მიერ სიების გადამოწმების შედეგად ირკვევა, რომ ამომრჩეველი სახელი და გვარით სანანი ბადაოვი რეგისტრირებულია მარნეულის 48-ე უბანზე,“ - განაცხადა სალაძემ.

სალაძის თქმით, ამას გარდა საია-ის დამკვირვებელმა კიდევ დააფიქსირა პირი, რომელმაც აღნიშნულ უბანზე ორჯერ მისცა ხმა. 5 პირს, რომლებსაც მარკირება უკვე გავლილი ჰქონდათ, კიდევ ცდილობდნენ ხმის მიცემას, თუმცა, ვერ მოახერხეს.

"საია ასევე მიმართავს პროკურატურას, დაიწყოს გამოძიება არჩევნების სავარაუდო გაყალბების ფაქტზე," - განაცხადა სულხან სალაძემ.