"ზუსტად ვიცოდით, რომ გვწერდნენ" - ფინანსთა მინისტრი "ომეგა ჯგუფის" საქმეზე გავრცელებულ აუდიოჩანაწერზე

პოლიტიკა - 20:41, 26 Nov, 2018

1242

ფინანსთა მინისტრმა ივანე მაჭავარიანმა ჟურნალისტებთან „ომეგა ჯგუფის“ წარმომადგენლებთან შეხვედრის აუდიჩანაწერზე ისაუბრა, რომელიც რადენიმე დღის წინ მედიაში გავრცელდა. მაჭავარიანის თქმით, ხელისუფლების წარმომადგენლებმა იცოდნენ, რომ მათ იწერდნენ:

„გარდა იმისა, რომ გაურკვევლად საუბრობენ და აბდა-უბდად, ამას გარდა, ასევე გაურკვევლად ამონტაჟებენ ჩანაწერს. ჩანაწერიდანაც კი ჩანს, რომ ჩვენ ვიყავით კონსტრუქციული. ჩვენ მათ ვთავაზობთ გამოსავალს. ერთ-ერთ გამოსავლად შეიძლება ჩაითვალოს საგადასახადო შეთანხმება, რომლითაც ისინი მოვიდნენ. ყოველთვიურად საგადასახადო შეთანხმებას რამდენიმე კომპანიასთან ვაფორმებთ, სადაც როგორც წესი, საურავებს ვპატიობთ და ზოგ შემთხვევაში ძირსაც კი ვუმცირებთ.

მიუხედავად ამდენი სიბინძურის და ტყუილისა, მაინც შევხვდით, ზუსტად ვიცოდით, რომ გვწერდნენ, მაგაში ეჭვი არავის ეპარებოდა. ვეუბნებოდით, რომ სანქცია-საურავის ჩამოწერის შანსი მაღალია. ძირზეც იყოს საუბარი, მაგრამ არა იმ დოზით და ოდენობით, რომ 50 მილიონიდან 40 მაჩუქე და 10 დამიტოვე, ამიტომ წადით, გადახედეთ და ხელახლა მობრძანდით.

ვერ დამისახელებთ, ვერცერთ კომპანიას, რომელსაც საგადასახადო შეთანხმებას ვუფორმებთ და ვეუბნებოდით ციფრებს. როდესაც მიგვაჩნია, რომ არაა საკმარისი, ვეუბნებით, წადით, გადახედეთ წინადადებას და ბევრი შემთხვევა ყოფილა, რომ მობრუნებულან უფრო კარგი შეთავაზებით ბიუჯეტისთვის და მერე დავთანხმებულვართ. მაგრამ ჩვენ არ ვეუბნებით რამდენი უნდა გაპატიოთ და ა.შ. თუმცა ჩვენ ვეუბნებით, რომ აი, ეს მიუღებელია და სწორედ ამას ვცდილობდი, რომ „ომეგასთვისაც“გამეგებებინა, რომ არ აქვს პერსპექტივა ამ თქვენს შემოთავაზებას ანუ აქვს პერსპექტივა, რომ წავიდეთ საგადასახადო შეთანხმებით, ოღონდ ეს უნდა იყოს საღ აზრთან ახლოს. ამას ვეუბნებოდი მანამდეც, შეხვედრისას, ჩაწერით და ჩაწერის გარეშე.“ - განაცხადა მინისტრმა.

მაჭავარიანის თქმით, ომეგა ჯგუფის“ მფლობელებს არც კომპანია ანაღვლებთ და არც 1 500 დასაქმებული ადამიანი. მინისტრმა ზაზა ოქუაშვილთან შეხვედრაც გაიხსენა მისი შეფასებით, „ომეგა ჯგუფის“ დამფუძნებელს „ელემენტარული მანერები ღალატობს და ზრდილობასთან მწყრალად არის“.