საარჩევნო ბიულეტენზე მითითებული ამომრჩევლის სახელი და გვარი - ოპოზიცია მმართველი გუნდის დანაშაულებრივ დავალებაზე საუბრობს

პოლიტიკა - 19:46, 26 Nov, 2018

944

გაერთიანებული ოპოზიციის წარმომადგენლები ცენტრალურ საარჩევნო კომისიაში იმყოფებიან და თავმჯდომარესთან შეხვედრას ითხოვენ. ოპოზიციის ინფორმაციით, რეგიონებში ცესკოს წევრებს აძლევენ ინსტრუქციას, რომ თუკი შემოხაზულ ბიულეტენზე მითითებული იქნება ამომრჩევლის სახელი და გვარი, ეს კანონდარღვევად არ ჩაითვლება.

ოპოზიცია ვარაუდობს, რომ ეს არის კიდევ ერთ მექანიზმი ამომრჩევლის გასაკონტროლებლად. ”ერთიანი ნაციონალური მოძრაობის” პოლიტიკური საბჭოს წევრი, ლევან ბეჟაშვილი ამბობს, რომ ხელისუფლება ამომრჩევლის ნების გაკონტროლებას ცდილობს.

„მოდის ინფორმაცია, რომ ცენტრალური საარჩევნო კომისიის წარომომადგენლები, ტრენერები, ასევე ოლქის წარმომადგენლები, აფრთხილებენ უბნის წევრებს, რომ თუ საარჩევნო ბიულეტენში აღმოჩნდა მითითება, რომელიმე ამომრჩევლის სახელის და გვარის, ეს ბიულეტენები არ ჩაითვალოს ბათილ ბიულეტენებად. ეს არის პირდაპირი, უხეში დარღვევა, საარჩევნო კანონმდებლობის ერთ-ერთი ფუნდამენტური პრინციპის ფარულობის და შესაბამისად, ცენტრალური საარჩევნო კომისიიდან ამ პოზიციის დაფიქსირება არის ნებსით თუ უნებლიედ, გაყალბებაში მონაწილეობა და გაყალბების ოფიციალურად, კანონიერად გაფორმება,“ - განაცხადა ლევან ბეჟაშვილმა.

„ნაციონალური მოძრაობის“ პოლიტიკური საბჭოს წევრი ცესკო-ს თავმჯდომარესთან, თამარ ჟვანიასთან დაუყოვნებლივ შეხვედრას მოითხოვს.

„ქართული ოცნება“ თავის ადმინისტრაციულ რესურსს, სწორედ ამ დავალებას აძლევს, რომ შემოხაზვისას მიუთითოს თავისი სახელი და გვარი, რომ მოხდეს იდენტიფიცირება, თუ რა არჩევანს აკეთებენ ისინი,“ - განაცხადა ლევან ბეჟაშვილმა.

ლევან ბეჟაშვილი კონკრეტულ სახელ და გვარებს ასახელებს. ის ჩხოროწყუს და მარტვილის ცესკო-ს ტრენერებისა და წარმომადგენლებზე მიუთითებს, რომელთა მხრიდანაც, მისი თქმით, კომისიის წევრებისადმი გაიცა დავალება, რომ ბათილად არ ჩაითვალოს ის ბიულეტენი, სადაც ამომრჩევლის სახელი და გვარი იქნება მითითებული.

„გვაქვს ორი ოფიციალური შეტყობინება, სადაც კონკრეტული სახელები და გვარებიც ვიცით. ეს არის ჩხოროწყუს ცენტრალური საარჩევნო კომისიის ტრენერი, ქალბატონი მაია გოგუა, ასევე მარტვილის ოლქის თავმჯდომარე, რომელიც თვითონ ატრენინგებს კომისიის წევრებს, მისი სახელია ნინო დანელია. ეს კონკრეტული შემთხვევები გვაქვს, როდესაც ეს ადამიანები ასეთი დავალებებს აძლევენ საუბნო კომისიის წევრებს და მეტიც, ჩვენმა კომისიის წევრებმა გადარეკეს ცენტრალური საარჩევნო კომისიის ცხელ ხაზზე და იქაც ანალოგიური განმარტება მიიღეს, რომ თურმე ბათილობის საფუძვლებში აღნიშნული დარღვევა არ არის განსაზღვრული და ბუნებრივია, ვერც იქნება განსაზღვრული, ეს არის მთავარი პრინციპის დარღვევა და კანონმდებელი ამას ისედაც არეგულირებს,“ - განაცხადა ლევან ბეჟაშვილმა.