"სამარცხვინო, ამაზრზენი ფაქტი, რომელიც გამოავლენს დღევანდელი კრემლის ბუნებას" - გრიგოლ ვაშაძე უკრაინულ გემებზე რუსეთის აგრესიას ეხმაურება

პოლიტიკა - 18:16, 26 Nov, 2018

1124

გაერთიანებული ოპოზიცია "ძალა ერთობაშიას" საპრეზიდენტო კანდიდატი გრიგოლ ვაშაძე ქერჩის სრუტეში მომხდარ ინციდენტზე კომენტარს აკეთებს და ამბობს, რომ „ეს არის სრულიად სამარცხვინო, ამაზრზენი ფაქტი და რომელიც სრულად გამოავლენს დღევანდელი კრემლის ბუნებას და მისწრაფებებს".

„ჩვენ ვიცით, რომ უკრაინა ისეთივე მსხვერპლი გახდა რუსული ტერორისტულ-სამხედრო აგრესიის, როგორც საქართველო 2008 წელს. თუ საერთაშორისო თანამეგობრობამ არ გამოიტანა საჭირო დასკვნები არც 2008 წელს საქართველოში და არც 2013-14 წელს უკრაინაში, ეს ყველაფერი შეიძლება კიდევ უფრო სავალალოდ დასრულდეს,“ - განაცხადა გრიგოლ ვაშაძემ.

შეგახსენებთ, კვირას, 25 ნოემბერს უკრაინის სამი სამხედრო გემი ოდესიდან შავ ზღვაში გავიდა. გემებს კურსი აზოვის ზღვაში მარიუპოლის პორტისკენ ჰქონდათ აღებული, მაგრამ ქერჩის სრუტესთან ისინი რუსმა სამხედროებმა შეაჩერეს. უკრაინულმა ხომალდებმა მარიუპოლისკენ გზა განაგრძეს, მაგრამ რუსეთმა სრუტე ტანკერით გადაკეტა, რასაც ვითარების გამწვავება მოჰყვა. 2003 წლის შეთანხმებით, ქერჩის სრუტე და აზოვის ზღვა რუსეთსა და უკრაინას შორის საზიარო წყლებია. ორივე ქვეყანა აქ თავისუფლად მოქმედებდა. მაგრამ 2014 წელს რუსეთმა ყირიმის ნახევარკუნძულის ანექსია მოახდინა და აზოვის ზღვის კონტროლქვეშ მოქცევას ცდილობს.