გაერთიანებული ოპოზიციის „ძალა ერთობაშიას“ საარჩევნო შტაბში გამართულ ბრიფინგზე, მამუკა გამყრელიძემ უფასო პოლიტიკური რეკლამების შესახებ ისაუბრა, რომლებიც ტელეკომპანია „იმედმა“ ეთერში არ გაუშვა.

გამყრელიძის განცხადებით, რეკლამა, რომელზეც საუბარია, ტელევიზიებს 16 ნოემბერს მიაწოდეს, მაგრამ „იმედმა“ რეკლამა არ გაუშვა. მათ კითხვებს კი პასუხი ტელეკომპანიის იურისტმა გასცა:

„იურისტმა კი ფრიად საინტერესო და უცნაური პასუხი გაგვცა - ჩვენ ვერ ჩავსვამთ თქვენს რეკლამას საეთერო ბადეში მიზეზს თვითონ ხვდებით. რანაირი იურიდიული კატეგორიაა ეს, ვერ ვხვდები.

საარჩევნო კოდექსის 51-ე მუხლის მეექვსე პუნქტის თანახმად, ყველა ტელევიზია ვალდებულია, არადისკრიმინაციურად და თანაბრად ჩასვას რეკლამები, რომლებიც პოლიტიკური პარტიებიდან მიეწოდება. პრობლემის არსებობის შემთხვევაში კი, ამავე მუხლის მე-15 პუნქტის თანახმად, ამის გარკვევის ვალდებულება კომუნიკაციების მარეგულირებელ კომისიას აქვს და არა ტელეკომპანიის იურისტს”, - განაცხადა გამყრელიძემ.