პენსიონერების მოსყიდვის შესაძლო ფაქტი ქუთაისში - მესამე სექტორი შეშფოთბას გამოთქვამს

პოლიტიკა - 15:41, 26 Nov, 2018

646

ქუთაისში პენსიონერებისთვის ხმის მიცემის სანაცვლოდ "ქართული ოცნების" წარმომადგენლების მხრიდან სავარაუდოდ თანხის დარიგებას მესამე სექტორი ეხმაურება.

"საქართველოს რეფორმების ასოციაციის“ წევრი შორენა ლაღაძე აცხადებს, რომ პენსიონერებმა დაადასტურეს, რომ მათ 50-70 ლარს მისცეს და განუცხადეს, რომ ფინანსური დახმარება ჯანდაცვის სახელმწიფო პროგრამის ფარგლებში ხორციელდება.

„როგორც განაცხადეს იმ ადამიანებმა, ვინც ეს თანხა მიიტანეს ამ პიროვნებებამდე, ეს თანხა იყო განკუთვნილი წამლებისთვის და ეს იყო სახელმწიფო პროგრამა. რეალურად, არსებობს სახელმწიფო პროგრამა, რომელიც ითვალისწინებს მხოლოდ და მხოლოდ წამლებით უზრუნველყოფას პენსიონერების გარკვეული ჯგუფის, თუმცა, ეს ხდება ოფიციალურად, მას შემდეგ, რაც პენსიონერი მივა აღრიცხვაზე მყოფ პოლიკლინიკაში და შემდეგ მივა აფთიაქში. ამ შემთხვევაში ეს მოხდა ხელზე ფულის მიცემით, არანაირ დოკუმენტზე არ ყოფილა ხელი მოწერილი,“ - განაცხადა შორენა ლაღაძემ.

„საქართველოს რეფორმების ასოციაციის” (GRASS) წარმომადგენელი, ირინა გურგენაშვილი აღნიშნავს, რომ არჩევნებამდე რამდენიმე დღით ადრე ამომრჩევლისთვის ფულის მიცემა კანონდარღვევაა.

„პირდაპირ თანხის გადაცემა, მით უმეტეს, წინასაარჩევნოდ, ორი დღით ადრე, ღამის 12:00 საათზე, ჩვენთვის ეს არის, სავარაუდოდ, ამომრჩევლის მოსყიდვის ფაქტი. ეს არის ძალიან მძიმე დარღვევა როგორც საარჩევნო კოდექსის, ისევე საქართველოს კანონმდებლობის, სისხლის სამართლის დანაშაულთანაც შეიძლება საქმე გვქონდეს,“ - განაცხადა ირინა გურგენაშვილმა.