„ვინც ნება გამოხატა, რომ 48-ს უნდა დაეხმაროს, ჩვენ ყველას მივესალმებით“ - „ოცნების“ შტაბი ჩახალიანის მიერ ზურაბიშვილის მხარდაჭერაში პრობლემას ვერ ხედავს

პოლიტიკა - 15:26, 26 Nov, 2018

1053

სეპარატისტული განწყობებით ცნობილი ვაჰაგნ ჩახალიანის მიერ სალომე ზურაბიშვილისთვის გამოცხადებულ მხარდაჭერას „ქართული ოცნების“ ახალქალაქის შტაბში დადებითად აფასებენ.

„მე როგორც ვიცი, თავისი სურვილით კაცმა, თავისი აზრი გამოხატა და 48-ს ამჯერად მხარი დაუჭიროს, ვინაიდან ჩვენ მშვიდობა გვინდა. ვიცი, რომ ეგ ადამიანი ორ სამ ადგილას ყოფილა. ვინც ნება გამოხატა, რომ 48-ს უნდა დაეხმაროს ჩვენ ყველას მივესალმებით. „ნაციონალური მოძრაობის“ დროს ეგ ადამიანი აწამეს. პოლიტპატიმარი იყო,“- აცხადებენ „ქართული ოცნების“ შტაბში.

„ქართული ოცნების“ შტაბი ჯავახეთში უარყოფს, რომ ვაჰაგნ ჩახალიანი სოფლებში მათი დავალებით დადის და ამომრჩეველთან სალომე ზურაბიშვილის სააგიტაციო კამპანიას ეწევა. პარტიაში ამბობენ, ფაქტთან კავშირი არ აქვთ და ჩახალიანი, ზურაბიშვილისთვის მხარდამჭერებს საკუთარი სურვილით აგროვებს.

შეგახსენებთ, რომ „ჯავახკის“ დამფუძნებელმა, ვაჰაგნ ჩახალიანი სომხეთიდან საქართველოში 5 დღის წინ, სპეციალურად წინასაარჩევნოდ დაბრუნდა. ის უკვე ჩაერთო მმართველი გუნდის რჩეული კანდიდატის კამპანიაში. მან მოსახლეობასაც მიმართა და ზურაბიშვილის მხარდაჭერისკენ მოუწოდა.