საქართველოს პრეზიდენტმა გიორგი მარგველაშვილმა „საზოგადობრივი მაუწყებლის“ ჟურნალისტთან ქეთევან ქარდავასთან ინტერვიუში გმირი უწოდა ყველა იმ სამხედრო მოსამსახურეს, რომელიც 2008 წლის რუსეთ-საქართველოს ომში იბრძოდა. ჰააგის პროკურორის ბენსუდას მიერ დაწყებულ გამოძიებაზე განცხადებების გაკეთებისას პრეზიდენტი პოლიტიკოსებს მეტი სიფრთხილისკენ მოუწოდებს:

„2008 წელს ვინც იბრძოდა ბრძოლის ველზე, იმ გმირობის პარალელურად, რომ მათ ებრძოდა ყველაზე ძლიერი სამხედრო მანქანა- რუსეთის ფედერაციის რეგულარული ჯარი, ეს იყვნენ ადამიანები რომლებსაც ბრძოლი ველზე არ დაუკარგავთ არც სითამამე და მთავარი, რითიც ჩვენ შეგვიძლია ვიამაყოთ, არ დაუკარგავთ ჰუმანურობა. საქართველოს და ქართველ ჯარისკაცებს არანარი პრობლემა არ უდგათ და რამდენიც არ უნდა იყოს ამ საკითხზე პოლიტიკური დისკუსია, მათ საქართველოს საზოგადოება დაიცავს ყოველთვის. თუმცა ის რისი განხილვაც ხდება მოხდა 10 წლის წინ, მოხდა რა რეგიონში? მოხდა ბრძოლის ველზე. ბრძოლის ველზე ობიექტური მესამე დამკვირვებელი არ არსებობს, ორია მხარე და დანარჩენი არის იქიდან გამოტანილი ამბავი, თუ რა ხდებოდა. ამ კონტექსტში პოლიტიკური განცხადებები მნიშვნელობას იძენს, ამიტომ ძალიან ფრთხილად უნდა ვიყოთ. არ უნდა ვეთამაშოთ პოლიტიკურ ჟარგონებს, როგორიცაა „ომის დაწყება“, „ქალაქის დაბომბვა“, „დანაშაული“. საქართველოს პრეზიდენტს, ვინც არ უნდა იყოს, ექნება წვდომა ყველა დოკუმენტაციასთან და არ მიყვარს ეს გამოთქმა- ენა მოუტრიალდეს, ან მოუნდეს, რომ რაიმე ვალდებულება აკიდოს იმ ადამიანებს. წარმოიდგინეთ როგორი ომია, ჩვენ ვებრძოდით ბირთვულ სახელმწიფოს, უძლიერეს სამხედრო სახელმწიფოს, იქ წასული თითოეული ჯარისკაცი იყო გმირი.“- განაცხადა გიორგი მარგველაშვილმა.