"დავალიანების განულების ინიციატივა არის ერთჯერადი აქცია... ბანკებზე წნეხი ან დაძალება არ ყოფილა"- სებ-ის პრეზიდენტი

პოლიტიკა - 17:56, 22 Nov, 2018

763

საქართველოს ეროვნული ბანკის პრეზიდენტმა პარლამენტის საფინანსო-საბიუჯეტო კომიტეტის სხდომაზე მოქალაქეთა დავალიანების განულების შესახებ ისაუბრა, კობა გვენეტაძის თქმით მოქალაქეთა დავალიანების განულების შესახებ გარიგების პირობები კომერციული ინფორმაციაა, რომელიც მხოლოდ თავად ფონდმა „ქართუმ“ ან ბანკებმა შეიძლება გასცენ. მისი განცხადებით ბანკებისა და ონლაინ კომპანიებთან მოლაპარაკებების პროცესში არანაირი ზეწოლა არ ყოფილა, რამდენიმე ბანკმა ამ მოლაპარაკებებში მონაწილეობაზე უარი განაცხადა:

„ეს არის ორ ბიზნეს სუბიექტს შორის გარიგება და გარიგების პირობებთან დაკავშირებით არ მაქვს სრული ინფორმაცია. რაც შეეხება იმას, ხომ არ იყო ზეწოლა, მაგალითად შემიძლია გითხრათ, რომ რამდენიმე ბანკმა მონაწილეობა არ მიიღო ამაში. უბრალოდ განაცხადეს, რომ არ სურდათ, რამდენიმე ონლაინ კომპანიამ არ მოისურვეს ეს და ისინი არ იღებენ მონაწილეობას. რამე . გარიგების პირობები კი, არის კომერციული ინფორმაცია, რომელიც შეუძლია თავად ფონდმა გასცეს ან კომერციულმა ბანკებმა.“- განაცხადა გვენეტაძემ.

გვენეტაძის თქმით, ეროვნული ბანკი არის აპოლიტიკური ორგანიზაცია და დავალიანების განულების ინიციატივის პროცესში მისი როლი ორ ბიზნეს სუბიექტს შორის გარიგებასთან დაკავშირებით გარკვეული კონსულტაციაა. გვენეტაძის განცხადებით, დავალიანების განულების ინიციატივა არის ერთჯერადი აქცია, მაგრამ ძალიან კარგი შესაძლებლობაა მოქალაქეებისთვის, რადგან მოქალაქეთა ამ ჯგუფს მიეცემა საშუალება, ოფიციალურად დასაქმდნენ და ეკონომიკის განვითარებაში თავიანთი კონტრიბუცია შეიტანონ.

„ვფიქრობ, ეს დადებითი მომენტია და ეკონომიკურ ზრდაზე დადებითად უნდა იმოქმედოს. ზოგადად, ურისკო ქმედება არ არსებობს და შეიძლება, ამასაც ახლდეს გარკვეული რისკი. ეს არის ე.წ. მორალური რისკი, რომ მომავალში შეიძლება, იფიქრონ მსესხებლებმა, რომ აი მეც არ გადავიხდი ამ სესხს. აქ ძალიან მნიშვნელოვანია, რომ ეს არის ერთჯერადი აქცია და მომავალში ასეთი რამ აღარ გაკეთდება. ეს ერთჯერადი აქციაა, მაგრამ ძალიან კარგი შანსია მოქალაქეებისთვის, რათა მათ სუფთა ფურცლიდან დაიწყონ ცხოვრება, ასევე, უნდა გაითვალისწინონ ძველი შემთხვევები და უფრო ფრთხილად იყვნენ. კიდევ უფრო მნიშვნელოვანია, რომ ეს ებმის პასუხისმგებლიანი დაფინანსების პრინციპების შემოღებას, რომელიც წლის ბოლოს შევა ძალაში.“- განაცხადა გვენეტაძემ.