„ქართულმა ოცნებამ“ ოპონენტების წინააღმდეგ ბარში დაწყებული კამპანია, მაღალ მთაში გააგრძელა და ანტი-ნაციონალური მოწოდებების გასაკეთებლად ზღვის დონიდან 2500 მეტრზე, გომისმთაზე ავიდა.

"ქართული ოცნების" შტაბის წარმომადგენლებმა, რომლებიც აქტიურად არიან ჩართულები სალომე ზურაბიშვილის საარჩევნო კამპანიაში, თოვლიანი გომისმთა პარტიის ლიდერთა გადიდებული ფოტოებით დალაშქრეს და იქედან ვიდეო მიმართვაც გაავრცელეს, სადაც საუბარია იმაზე, თუ როგორი ცუდი და ბნელი იყო ის 9 წელიწადი, როცა ხელისუფლებაში "ნაციონალური მოძრაობა" იმყოფებოდა და რომ ქვეყანამ უარი უნდა უთხრას წარსულში დაბრუნებას.

თოვლსა და ქარბუქში, მაღალმთიანი კურორტს, აღნიშნული მოწოდებების გასაკეთებლად ნუგზარ გიორგაძე, კობა ხაბალაშვილი (ოზურგეთის მერიის აუდიტის სამსახურის ხელმძღვანელი), გია ხაჭაპურიძე („ოცნების" შტაბი) და ეკა ნინიძე (ქ.ოზურგეთის ბაღების გაერთიანების ყოფილი ხელმძღვანელი) სტუმრობდნენ.