„ქვეყანა სათამაშო არაა... გათენების და დაღამების არ უნდა გვეშინოდეს"- გაერთიანებული ოპოზიცია ზესტაფონის მოსახლეობას შეხვდა (ვიდეო)

პოლიტიკა - 14:36, 22 Nov, 2018

1645

გაერთიანებული ოპოზიცია მოსახლეობასთან შეხვედრას განაგრძობს, დღეს „ძალა ერთობაშიას“ ლიდერები ყოფილ პირველ ლედისთან, სანდრა რულოვსთან ერთად იმერეთის რეგიონში იმყოფებიან. ზესტაფონის ბაზარში მოვაჭრეებთან შეხვედრის დროს ბაჩუკი ქარდავას და სანდრა რულოვსს თან ახლდათ „ევროპული საქართველოს“ ერთ-ერთი ლიდერი აკაკი ბობოხიძე და იუმორისტი ქართლოს ნატროშვილი.

მოვაჭრეები სანდრა რულოვს და ოპოზიციის წარმომადგენლებს იმ პრობლემებზე ესაუბრნენ, რომელიც იმერეთის მოსახლეობას აწუხებს, მათ შორისაა მძიმე სოციალური მდგომარეობა და უმუშევრობა. მათი თქმით ხალხს ფული არ აქვს, შესაბამისად ბაზარში ვაჭრობაც შემცირებულია. მოსახლეობა ხელისუფლებას ტყუილი დაპირებების გაცემაში ადანაშაულებს. როგორც მოვაჭრეები აცხადებენ, „ქართული ოცნება“ ქვეყანას სათამაშოსავით ეპყრობა:

„ქვეყანა სათამაშო არაა... ჩვენ არსებობა გვინდა, ოჯახები გვყავს, ამდენი ტყუილები როგორ შეიძლება. მშვიდობიან ქვეყანაში გვინდა ცხოვრება, გათენების და დაღამების არ უნდა გვეშინოდეს.“- განაცხადა ერთ-ერთმა მოვაჭრემ.

ოპოზიციამ ამომრჩველებს 28 ნოემბერს აქტიურობისკენ მოუწოდა, მათი განხადებით ცვლილებებისთვის აუცილებელია ამომრჩეველი სახლში არ დარჩეს და მათი უკმაყოფილება საარჩევნო ყუთებთან დააფიქსირონ.