თემირლან მაჩალიკაშვილის მამამ, მალხაზ მაჩალიკაშვილმა სპეციალური ბრიფინგი გამართა. მისი თქმით, მის შვილს ხელყუმბარა არ ჰქონია, როგორც ამას ირაკლი ჩიმაკაძე ამტკიცებს. დშვილმოკლული მამა აცხადებს, რომ ასაფეთქებელი ნივთიერება ადგილზე 19 წლის ბიჭის მკვლელობის შემდეგ მიიტანეს.

“სოსო გოგაშვილი იმ დილით ჩვენთან ხეობაში იყო ამოსული. რა მხეციც არის გოგაშვილი, ის მხეცია ირაკლი ჩიმაკაძეც. მათი ადგილი ციხეშიც არ არის, ციხეში ადამიანები სხედან, ესენი კი, მხეცები არიან. თემირლანის სისხლი არ შერჩებათ“- ამბობს მაჩალიკაშვილი.

მალხაზ მაჩალიკაშვილმა სპეცოპერაციის დღე გაიხსენა და აღნიშნა, რომ ოჯახი 4 საათის განმავლობაში მძევლად ჰყავდათ აყვანილი, ვიდრე იმ ხელყუმბარას მოიტანდნენ.

„მეორე სართულზე, თემირლანის ოთახში, რომ ამიყვანეს და მითხრეს, თემირლანმა წინააღმდეგობა გაგვიწიაო, ლოგინს, იატაკს რომ შევხედე, მთლიანად სისხლში იყო ამოსვრილი. იქვე ეგდო თემირლანის ტელეფონი, რომელიც სისხლში იყო ამოსვრლი, ასევე ყურსასმენებიც.

რა ხელყუმბარაზე საუბრობთმეთქი, ვკითხე. გახედე, ხელმარცხნივ ხელყუმბარააო, მითხრეს. გავხედე და ერთი წვეთი სისხლი არ იყო იმ ხელყუმბარაზე. შეხედეთ, ამაზე ერთი წვეთი სისხლიც არ არისმეთქი. თემრილანს ხელში რომ სჭეროდა ხელყუმბარა, ის სისხლში ამოსვრილი უნდა ყოფილიყო”- აღნიშნავს მაჩალიკაშვილი და დასძენს, რომ მისი შვილი ადგილზე მოკლეს.

„ მას ისეთი იარაღიდან აქვს მიყენებული ჭრილობა, რომ ის ფაქტობრივად ადგილზევე გარდაიცვალა. როცა სისხლი ცივდება, თითის ანაბეჭდის აღება შეუძლებელია. თემირლანი ცოცხალი რომ ყოფილიყო, ანაბეჭდებსაც აიღებდნენ. ესენი ყველანი ერთნი არიან, მათ ყველას ერთად აქვთ დანაშაული ჩადენილი, ისინი ერთმანეთს ხელს აფარებენ. ისინი ამაზე პასუხს კანონის ფარგლებში გაგვცემენ“- აღნიშნა მალხაზ მაჩალიკაშვილმა.

მისი თქმით, ნორმალურ ქვეყანაში მთავრობა თვითონ გადადგებოდა.