"შავი სიების გაუქმება მსესხებლების პრობლემას ვერ მოაგვარებს"

"შავი სიების გაუქმება მსესხებლების პრობლემას ვერ მოაგვარებს" - გიორგი კეპულაძე

პოლიტიკა - 19:44, 20 Nov, 2018

1352

„საზოგადოება და ბანკების“ ხელმძღვანელის, გიორგი კეპულაძის განცხადებით, ბანკებში შავი სიების გაუქმებით პრობლემის მოგვარება შეუძლებელია. კეპულაძე აღნიშნავს, რომ ძნელია ეკონომიკური ანალიზის გაკეთება პოლიტიკოსების წინასაარჩევნო დაპირებებზე.

მისი თქმით, "კრედიტ ინფო" ნეგატიურ ჩანაწერებს დაახლოებით ხუთი წელი ინახავს და შესაბამისად, ამ 600 ათასი ადამიანიდან რამდენმა დაფარა სესხი და რამდენი დარჩა მოვალეთა სიაში, რთული გასარკვევია.

"ზოგადად, წინასაარჩევნო დაპირებები ხშირად სცდება ხოლმე რეალობებს. ვერ გეტყვით, რა სქემა აქვთ ამჯერად პოლიტიკოსებს, რომ ვისაც სესხი აქვთ ბანკში, მათი პრობლემა ერთი ხელის მოსმით გადაჭრან. მაშინ ჩვენ უნდა ვუთხრათ კომერციულ ბანკებს, რომ ვინც შავ სიაშია, ვისაც მიმდინარე ვალდებულება აქვს და ვერ იხდის სესხს, მათ კიდევ ერთხელ მისცენ სესხი, თორემ შავი სიიდან ამოღება არანაირ შედეგს არ მოგვცემს. მთავარი პრობლემა ის არის, რომ ისინი ვეღარ ახერხებენ ახალი სესხის აღებას და ამ სესხით ფინანსური მდგომარეობის გაუმჯობესებას...

ბევრი დაპირება მოგვისმენია პოლიტიკოსებიდან, როგორც ხელისუფლებისგან, ისე ოპოზიციისგან, მაგრამ ისინი ხშირად დარჩენილან დაპირებებად. სასურველია, მათი დაპირებები ეკონომიკურად გააზრებული იყოს და ზუსტად ჰქონდეთ გათვლილი, რა ეფექტს მიიღებენ ამ ყველაფრისგან. ის, რომ შავი სიიდან ადამიანებს ამოვიღებთ, არაფერს არ ნიშნავს. თუ ეს ადამიანები არ აპირებენ კვლავ სესხის აღებას. თუ ადამიანი ბანკში მიდის სესხის ასაღებად და ბანკს არ ექნება ინფორმაცია იმის შესახებ, თუ როგორი გადამხდელუნარიანია ადამიანი, შესაძლოა, ბანკმა თავი შეიკავოს საეჭვო ფინანსური მდგომარეობის ადამიანის დაფინანსებაზე. როდესაც პოლიტიკოსები დაპირებებს გასცემენ, ამას იმის საფუძველზე აკეთებენ, რომ ხელისუფლებაში მოვლენ და ბიუჯეტს განკარგავენ. სახელმწიფოს შეუძლია, რომ შესთავაზოს მომხმარებელს სუფსიდირება. მეორე საკითხია, ეკონომიკურად რამდენად გამართლებულია ეს ყველაფერი. შეძლებით ბევრი რამ არის შესაძლებელი. თუ ხელისუფლება გადაწყვეტს, რომ წელს დაასუფსიდიროს არა რთველი, არამედ მსესხებლები. ნებისმიერ ხელისუფალს შეუძლია ეს გააკეთოს, თუ ექნება ამის სახსრები და თუ იქნება პოლიტიკური ნება. ყველა შემთხვევაში, ამ თანხის გაღება სახელმწიფოს ბიუჯეტიდან მოუწევთ, პოლიტიკოსები ასეთ დაპირებებს არ იძლევიან საკუთარი ჯიბის ფულის ხარჯზე. თუ ისინი ამბობენ, რომ ჩვენ დავეხმარებით მათ, ვისაც დოლარში აქვს სესხი აღებული და ვერ აბრუნებს თანხას, ეს იქნება დახმარება გადასახადების გადამხდელების ხარჯზე. ილუზია არავის უნდა ჰქონდეს, რომ ვიღაც მოვა, ჯადოსნურ ჯოხს მოიქნევს და ყველაფერი მოგვარდება“, - აცხადებს კეპულაძე.