"ხელისუფლება არის ისტერიკაში და ყველფერზე მიდის, რომ ზურაბიშვილს მოაგებინოს" - ოპოზიცია ყალბი პირადობების ბეჭვდაზე საუბრობს

პოლიტიკა - 18:43, 20 Nov, 2018

828

ყალბი პირადობის მოწმობების ბეჭვდვასთან დაკავშირებით არასამთავრობო ორგანიზაციების მიერ გავრცელებულ ინფორმაციას ევროპული საქართველო საგანგებო განცხადებით ეხმაურება. სერგი კაპანაძის თქმით, პანიკაში მყოფი ხელისუფლება ყველა გზით ცდილობს საპრეზიდენტო არჩევნების მეორე ტურში საკუთარი კანდიდატის, სალომე ზურაბიშვილის, გაყვანას.

ოპოზიციის წარმომადგენელი ხელისუფლებას მოუწოდებს, არ გადადგან უკანონო ნაბიჯი და არ შელახონ საქართველოს მოქალაქეების თავისუფალი ნების გამოხატვის უფლება.

„ეს ინფორმაცია, რომელიც გავრცელდა, არის ძალიან შემაშფოთებელი. პირველ რიგში, მეტყველებს და მიუთითებს იმაზე, რომ ხელისუფლება არის ისტერიკაში და ყველა ნაბიჯზე მიდის, ყველა ინსტრუმენტს იყენებს იმისთვის, რომ როგორღაც მეორე ტურში მოაგებინოს სალომე ზურაბიშვილს. ეს არის ქმედება, რომელიც ისჯება კანონით და მათ კონკრეტულ ადამიანებს, რომლებიც დასახელებული იყვნენ, თუ მათ ხელმძღვანელებს აუცილებლად მოუწევთ ამაზე პასუხის გაცემა ადრე თუ გვიან. ნუ გადააყოლებენ ქვეყნის ინტერესებს თავი პარტიულ ინტერესებს,“ -განაცხადა სერგი კაპანაძემ.