"ზღაპარია მილიარდნახევარ ლარზე საუბარი... მორიგი საარჩევნო ტრიუკია"- რომან გოცირიძე

პოლიტიკა - 16:25, 19 Nov, 2018

1878

საპარლამენტო ფრაქცია “ნაციონალური მოძრაობის“ თავმჯდომარის რომან გოცირიძის თქმით, მილიარდ ნახევარი ოდენობის ვალის ჩამოწერასთან დაკავშირებით მთავრობის ინიციატივა მორიგი წინასაარჩევნო ბლეფია გოცირიძის განცხადებით, ეს არის კომერციულ ბანკებს შორის ფინანსური გარიგება და ერთი კატეგორიის ბანკებიდან მეორე ბანკისადმი სესხის დათმობა, რასაც სახელად მთავრობის აქცია დაერქვა, რაც კანონდარღვევაა:

“გაუგებარია მთავრობის ინიციატივა ვალების ჩამოწერასთან დაკავშირებით. ან მთავრობა რა შუაშია, თუ ამას ”ქართუ” აკეთებს? ან ქართუ რას აკეთებს ვინმემ გაიგო?

საუბარია 2 ათას ლარამდე უიმედო სესხების ჩამოწერაზე. ყოველწლიურად კომერციული ბანკები ისედაც ახდენენ მსგავსი სესხების ჩამოწერას. შარშან 70 მილიონი ლარი იქნა ჩამოწერილი. ბოლო ათ წელიწადში საშუალოდ 50 მილიონი ლარის ოდენობის უიმედო ვალის ჩამოწერა ხდება ყოველწლიურად. როგორც ჩანს, კომერციულ ბანკებს წაეშველება ქართუ რამდენიმე ათეული მილიონით. ზღაპარია მილიარდნახევარ ლარზე საუბარი. უნდათ რაღაც იდეის წინასაარჩევნოდ შეფუთვა.

რომელი დაპირება შესრულდა:

-600 მილიონი ევროს ღირებულების სიმსივნის თერაპიის ცენტრი?

-500 მილიონი ევროს ღირებულების ქუთაისის უნივერსიტეტი?

-ერთი მილიარდი დოლარის ოდენობის აგრარული უფასო ფულის ფონდი?

-120 მილიონი დოლარის ღირებულების სოფლის საყოველთაო ინტერნეტიზაციის პროგრამა?

ასეთივე ბლეფია მილიარდნახევრის ჩამოწერა. თავი ფული რამდენჯერმე ნაკლებია და უიმედო სესხების ჩამოწერა ბანკებთან ერთად ქართუს მონაწილეობით მორიგი საარჩევნო ტრიუკია.

პირველ ტურამდე რატომ არ გააკეთეს? კარგი ყოფილა სახელისუფლებო კანდიდატის წაგება. მეორე ტურში რომ წააგებს, იქნებ მართლა დაიწყოს ადრონული თერაპიის ცენტრის მშენებლობა?

პრემიერ-მინისტრის დღევანდელი განცხადება არის ამომრჩევლის მოსყიდვა, მაგრამ ხმასაც კი არ ამოვიღებთ, ოღონდ რაიმე გააკეთონ.

როცა სინამდვილე გაირკვევა, აღმოჩნდება, რომ ისე არ წვიმს, როგორც ქუხს.”- წერს რომან გოცირიძე ფეისბუკზე.