"რას აკეთებთ? ან სახელმწიფო იცით, რა არის, ან სახელმწიფო ინტერესი?"- ვაშაძე სამხედროების შესაძლო გასამართლებაზე „ოცნების“ ლიდერების განცხადებას შემაშფოთებელს უწოდებს

პოლიტიკა - 15:43, 16 Nov, 2018

1184

გაერთიანებული ოპოზიციის საპრეზიდენტო კანდიდატის, გრიგოლ ვაშაძის საარჩევნო შტაბის ხელმძღვანელი გიორგი ვაშაძე შემაშფოთებელს უწოდებს „ქართული ოცნების“ ლიდერების მხრიდან აგვისტოს ომსა და ჰააგის სასამართლოსთან დაკავშირებით გაკეთებულ განცხადებას.
გიორგი ვაშაძის განცხადებით, მმართველი გუნდი თავის განცხადებებში ქართველ სამხედროებს და საქართველოს სახელმწიფოს ერთმანეთისგან აცალკევებს და ამით დიდ საფრთხეს უქნის როგორც თავად სამხედროებს, ასევე დეოკუპაციის პოლიტიკასაც. ვაშაძე „ოცნებას“ იუსტიციის მინისტრის გათავისუფლებისკენ მოუწოდებს და აცხადებს, რომ თეა წულუკიანი თავისი უწყებით სახელმწიფო ინტერესების წინააღმდეგ მოქმედებს.

“საგანგაშო მდგომარეობა გვაქვს, „ქართული ოცნება“ გადავიდა აღვირახსნილ სიცრუეზე, მათი დღევანდელი განცხადებები ჰააგის სასამართლოსთან დაკავშირებით აღარანაირ ნორმაში არ ჯდება. დღეს კალაძემ განაცხადა, რომ თითქოს ჩვენ ვამბობთ იმას, რომ ჰააგის სასამართლომ შეიძლება გამოიძიოს კონკრეტული სამხედროების საქმეები, ბატონო კახი მოუსმინეთ თქვენი იუსტიციის მინისტრის განცხადებას, უფრო მეტიც წულუკიანმა ჩაიდინა დანაშაული და განაცხადა, რომ ეს სამხედროები და სახელმწიფო არაფერ კავშირში არ არიან ერთმანეთთან, თითქოს ეს გმირები იყვნენ ვიღაცები. 2015 წელს ქალბატონმა წულუკიანმა გააგზავნა წერილი ჰააგის სისხლის სამართლის სასამართლოში სადაც თქვა, რომ ქართულმა მხარემ შეწყვიტა გამოძიება 2008 წლის ომთან დაკავშირებით, რა მიზნით? ძალიან კარგად იცოდა, რომ ჰააგის სისხლის სამართლის სასამართლო სწორედ ჩვენი სამხედროების წინააღმდეგ დაიწყებდა გამოძიებას ამის შემდეგ. რამდენიმე თვეში კი ეს გამოძიება ისევ გაანახლა, ეგონა, რომ ეს შეუმჩნეველი დარჩებოდა. უფრო მეტიც ბატონო ქართული ოცნების ლიდერებო, წლევანდელი წლის აგვისტოში სამოქალაქო სექტორმა პირდაპირ მოგიწოდათ, რომ დაუშვებელია საპრეზიდენტო არჩევნებში მონაწილე სუბიექტებისა და კანდიდატების მხრიდან 2008 წლის ომის საკითხებით სპეკულაცია, რადგან ამან შეიძლება გამოუსწორებელი ზიანი მიაყენოს ომით დაზარალებული პირებისთვის სამართლიანობის აღსრულებას, ეს ყველამ მოგიწოდათ და რას აკეთებთ საერთოდ? ან სახელმწიფო იცით რა არის? ან სახელმწიფო ინტერესი? ხომ არ შეიძლება თქვენს პერსონალურ ინტერესებს გადააყოლოთ ქვეყანა? ხომ არ შეიძლება რომ შენნი ქვეყნის წინააღმდეგ მოქმედებდე ყველა ნაბიჯით. ეს არის გამოუსწორებელი შედეგები, რაც შეიძლება საქართველომ იწვნიოს დეოკუპაციასთან მიმართებაში. არ შეიძლება სამხედროებს ხაზი გადაუსვათ ხალხო. ძალიან გთხოვთ გონს მოეგეთ, ეს თქვენი განცხადებები ისევ რუსეთის მიერ იქნება გამოყენებული, როგორც თქვენი პრეზიდენტობის კანდიდატის სიტყვებია გამოყენებული, იმედი მაქვს, რომ ვერაასდროს ეღირსება ეს ქალბატონი პრეზიდენტობას. ხალხო, არსებობს ქვეყანა, სახელმწიფო ინტერესი და სამშობლო, არ შეიძლება ხაზი გადაუსვათ ამ ყველაფერს. შეეშვით ამ კატასტროფას.კიდევ ერთხელ ვამბობ, თქვენი იუსტიციის მინისტრი გაათავისუფლეთ თანამდებობიდან და ჩააბარეთ ვინმე ნორმალურს ეს საქმე. ხომ არ შეიძლება ქვეყნის წინააღმდეგ საკუთარი იუსტიციის სამინისტრო მოქმედებდეს, რასაც ის აკეთებს 2015 წლიდან.“- განაცხადა გიორგი ვაშაძემ.